ایرانی وزیر خارجہ کا پاکستانی قیادت سے رابطہ، جنگ بندی امور پر مشاورت

ایران کے وزیرِ خارجہ عباس عراقچی نے پاکستان کی اعلیٰ سیاسی و عسکری قیادت سے ٹیلیفونک رابطے کیے ہیں، جن میں خطے کی مجموعی صورتحال، بڑھتی ہوئی کشیدگی اور ممکنہ جنگ بندی سے متعلق امور پر تفصیلی تبادلہ خیال کیا گیا۔ ایرانی میڈیا کے مطابق، عباس عراقچی نے پاکستان کے نائب وزیراعظم و وزیرِ خارجہ اسحاق ڈار اور فیلڈ مارشل عاصم منیر سے علیحدہ علیحدہ گفتگو کی، جس میں خطے میں پائیدار امن و استحکام کے لیے مشترکہ سفارتی کوششوں پر زور دیا گیا۔پاکستان اس وقت امریکہ اور ایران کے درمیان کشیدگی کم کرانے کے لیے ایک کلیدی ثالث کے طور پر متحرک ہے۔ وزیراعظم شہباز شریف، اسحاق ڈار اور عسکری قیادت مختلف عالمی دارالحکومتوں سے رابطے میں ہیں تاکہ جنگ کے بادلوں کو چھٹکا کر صورتحال کو مزید بگڑنے سے روکا جا سکے۔ اس تناظر میں ایرانی وزیرِ خارجہ کے پاکستان سے رابطے انتہائی اہمیت کے حامل سمجھے جا رہے ہیں۔بات چیت کے دوران عباس عراقچی نے واضح کیا کہ اسرائیلی جارحیت کے باوجود ایران کے تمام ریاستی ادارے مکمل نظم و ضبط اور اتحاد کے ساتھ کام کر رہے ہیں۔ انہوں نے امریکی صدر ڈونلڈ ٹرمپ کے اس دعوے کو مسترد کر دیا جس میں کہا گیا تھا کہ ایرانی حکومت انتشار اور اندرونی اختلافات کا شکار ہے۔ عراقچی کا کہنا تھا کہ:میدانِ جنگ اور سفارت کاری ایک ہی جنگ کے دو محاذ ہیں اور ان میں مکمل ہم آہنگی ہے۔ایرانی عوام پہلے سے زیادہ متحد ہیں اور قومی اتحاد میں کوئی دراڑ نہیں ہے۔امریکی صدر ڈونلڈ ٹرمپ نے اپنے حالیہ بیان میں ایران کے ساتھ ایک “مستقل اور ہمیشہ قائم رہنے والے معاہدے” کی خواہش کا اظہار کیا ہے، تاہم تہران کا موقف ہے کہ وہ کسی بھی دباؤ کے بجائے اپنے قومی مفادات اور وقار کو مدنظر رکھ کر ہی کوئی فیصلہ کرے گا۔