مہمند ڈیم پاکستان کی واٹر، فوڈ اور انرجی سکیورٹی کیلئے اہم قومی منصوبہ ہے: چیئرمین واپڈا

چیئرمین واپڈا لیفٹیننٹ جنرل محمد سعید (ریٹائرڈ) نے مہمند ڈیم پراجیکٹ کا اہم دورہ کیا اور مین ڈیم و پاور ہاؤس سمیت مختلف اہم سائٹس پر جاری تعمیراتی سرگرمیوں کا تفصیلی جائزہ لیا۔ اس موقع پر ممبر واٹر واپڈا عاصم رؤف خان بھی چیئرمین کے ہمراہ تھے۔ دورے کے دوران چیئرمین واپڈا نے پراجیکٹ حکام اور انجینئرز کو ہدایات دیں کہ منصوبے کی بروقت تکمیل کے لیے تعمیراتی کام کی رفتار میں مزید تیزی لائی جائے اور اعلیٰ ترین تکنیکی و کنسٹرکشن معیار کو ہر صورت یقینی بنایا جائے۔

 مہمند ڈیم پاکستان کی واٹر، فوڈ اور انرجی سیکیورٹی کے لیے ایک انتہائی اہم کثیرالمقاصد قومی منصوبہ ہے جو ملک کی پائیدار ترقی اور معاشی استحکام میں کلیدی کردار ادا کرے گا۔  منصوبے کی مکمل آبادی اور فعال ہونے کے بعد 12 لاکھ 90 ہزار ایکڑ فٹ پانی ذخیرہ کرنے کی صلاحیت حاصل ہوگی۔  مہمند ڈیم سے 800 میگاواٹ سستی، ماحول دوست اور کلین اینرجی حاصل کی جائے گی۔ یہ پراجیکٹ ہر سال نیشنل گرڈ کو 2 ارب 86 کروڑ یونٹ پن بجلی فراہم کرے گا۔