شہباز شریف کا نیپالی سفارتخانے کا دورہ، سیلاب سے ہلاکتوں پر اظہار تعزیت

وزیراعظم محمد شہباز شریف نے اسلام آباد میں نیپال کے سفارتخانے کا اہم دورہ کیا اور وہاں حالیہ تباہ کن سیلاب اور لینڈ سلائیڈنگ کے نتیجے میں ہونے والے جانی و مالی نقصان پر گہرے دکھ کا اظہار کرتے ہوئے تعزیتی کتاب میں اپنے تاثرات قلمبند کیے۔ سفارتخانے آمد پر نیپال کی سفیر ریٹا دھیتال نے وزیراعظم کا استقبال کیا۔ دورے کے دوران وفاقی وزیر اطلاعات عطااللہ تارڑ، معاون خصوصی سید طارق فاطمی اور سیکرٹری خارجہ آمنہ بلوچ بھی وزیراعظم کے ہمراہ موجود تھے۔

وزیراعظم شہباز شریف نے نیپالی حکومت اور عوام، بالخصوص سوگوار خاندانوں سے تعزیت اور کامل یکجہتی کا اظہار کیا۔ انہوں نے نیپال کے وزیراعظم بالندر شاہ سے ہونے والی گفتگو کا حوالہ دیتے ہوئے کہا کہ پاکستان اپنے برادر ملک کے ساتھ ہر مشکل گھڑی میں شانہ بشانہ کھڑا ہے۔  وزیراعظم نے اعلان کیا کہ پاکستان رواں ہفتے کے اواخر میں نیپال کے سیلاب متاثرین کے لیے ہنگامی امدادی سامان کی پہلی کھیپ فوری طور پر روانہ کرے گا تاکہ امدادی اور بحالی کے کاموں میں معاونت فراہم کی جا سکے۔  نیپال کی سفیر ریٹا دھیتال نے پاکستان کی جانب سے اس ہمدردانہ قدم اور فوری امداد کے اعلان پر وزیراعظم شہباز شریف کا شکریہ ادا کیا اور کہا کہ پاکستانی قیادت کا یہ برادرانہ اقدام دونوں ممالک کے قریبی تعلقات کی عکاسی کرتا ہے۔