سرکاری ہسپتالوں کی سہولیات پر اپوزیشن کی تحریک التوائے کار کثرت رائے سے مسترد

پنجاب اسمبلی کے اجلاس میں سرکاری ہسپتالوں کی مبینہ خراب صورتحال اور ناگفتہ بہ سہولیات سے متعلق اپوزیشن رکن زرناب شیر کی تحریک التوائے کار پیش کیے جانے پر ایوان شدید بدنزمی اور شور شرابے کا شکار ہو گیا۔

اجلاس کے دوران پینل آف چیئرپرسن سمیع اللہ خان نے صحت کے اس اہم معاملے پر بحث کی اجازت دینے سے قبل ایوان میں ووٹنگ کروائی۔ ووٹنگ میں تحریک التوائے کار کی مخالفت میں حکومتی ارکان کے 22 جبکہ حمایت میں اپوزیشن کے 18 ارکان نے ہاتھ کھڑے کیے۔ حکومت نے کثرتِ رائے کی بنیاد پر اپوزیشن کی اس تحریک کو مسترد کر دیا، جس پر چیئرپرسن نے اپوزیشن ارکان کو اس موضوع پر مزید بات کرنے سے روک دیا۔

بات چیت کی اجازت نہ ملنے پر اپوزیشن ارکان نے احتجاج کرتے ہوئے ہنگامہ آرائی شروع کر دی۔ اپوزیشن رکن ندیم قریشی نے اعتراض اٹھاتے ہوئے کہا کہ ایوان کو ‘فارم 47’ جیسا ماحول نہ بنایا جائے اور انہیں بات کا موقع دیا جائے۔ احتجاج کے دوران ندیم قریشی نے ایوان میں کورم کی نشاندہی کر دی، جس پر پینل آف چیئرپرسن سمیع اللہ خان نے کورم پورا کرنے کے لیے 5 منٹ تک گھنٹیاں بجانے کا حکم دے دیا۔