ٹرمپ اور اماراتی صدر کا ٹیلی فونک رابطہ، مشرق وسطیٰ کی صورتحال پر گفتگو

متحدہ عرب امارات کے صدر شیخ محمد بن زاید آل نہیان اور امریکی صدر ڈونلڈ ٹرمپ کے درمیان ایک اہم ٹیلی فونک رابطہ ہوا ہے، جس میں دوطرفہ تعلقات کی استواری، باہمی مفادات اور مشرقِ وسطیٰ میں تیزی سے بدلتی ہوئی حساس صورتحال پر تفصیلی تبادلہ خیال کیا گیا۔ عرب میڈیا کے مطابق دونوں رہنماؤں نے خطے میں امن و امان کے قیام اور حالیہ بحران سے نمٹنے کے لیے جاری کوششوں پر گفتگو کی، تاہم اماراتی حکام کے مطابق سرکاری اعلامیے میں کسی مخصوص سفارتی یا فوجی اقدام پر اتفاق کی تفصیلات جاری نہیں کی گئیں۔

یہ رابطہ ایک ایسے وقت میں سامنے آیا ہے جب امریکہ اور ایران کے درمیان فوجی کشیدگی میں شدید اضافہ ہو چکا ہے۔ امریکی حملوں کے جواب میں ایران کی جانب سے خلیجی خطے میں قائم امریکی تنصیبات پر میزائل اور ڈرون حملوں کی اطلاعات ہیں، جس کے بعد خلیجی ممالک نے اپنے فضائی دفاعی نظام (Air Defence System) کو ہائی الرٹ کر دیا ہے۔ اسی دوران ایرانی فوج نے کویت میں واقع احمد الجابر ایئر بیس پر امریکی سیٹلائٹ مواصلاتی نظام اور جنگی طیاروں کے ہینگرز کو نشانہ بنانے کا دعویٰ کیا ہے۔ آبنائے ہرمز اور خلیج میں پیدا ہونے والی اس کشیدگی سے عالمی سطح پر توانائی کی فراہمی متاثر ہونے اور خام تیل کی قیمتیں بڑھنے کے شدید خدشات پیدا ہو گئے ہیں۔