سندھ کی تقسیم کی بات بھی نہیں کی جاسکتی: مراد شاہ نے قومی اسمبلی کو خبردار کردیا

سندھ اسمبلی میں نئے صوبوں کے قیام سے متعلق پیپلز پارٹی کے رکن نثار کھوڑو کی پیش کردہ تحریک التوا پر چار روز کی بحث کے بعد سندھ کی تقسیم کے خلاف قرارداد منظور کر لی گئی ہے۔ اس موقع پر وزیراعلیٰ سندھ مراد علی شاہ نے ایوان سے خطاب کرتے ہوئے کہا کہ سندھ کے مستقبل کا فیصلہ کسی دوسرے فورم یا شہر میں بیٹھ کر نہیں کیا جا سکتا اور قومی اسمبلی سمیت تمام اداروں کو واضح ہونا چاہیے کہ سندھ کی تقسیم کی بات کرنا بھی ممکن نہیں۔ انہوں نے ایم کیو ایم کی سیاست کو تنقید کا نشانہ بناتے ہوئے کہا کہ ایک طرف مصطفیٰ کمال نئے انتظامی یونٹس کا مطالبات کرتے ہیں جبکہ دوسری طرف ان کے ارکان اسمبلی میں کہتے ہیں کہ سندھ نہیں ٹوٹنا چاہیے، جو ان کے دوغلے پن کو ظاہر کرتا ہے۔ وزیراعلیٰ نے مزید کہا کہ محض آبادی کو نئے صوبوں کی دلیل نہیں بنایا جا سکتا، تاہم بہتر گورننس کے لیے انتظامی اصلاحات، نئے اضلاع کے قیام اور بلدیاتی اداروں کو مزید بااختیار بنانے کے لیے قانون سازی کی جا سکتی ہے