وفاقی آئینی عدالت: تجاوزات کے خاتمے سے متعلق کیس سماعت کے لیے مقرر

اسلام آباد: وفاقی آئینی عدالت نے کراچی میں تجاوزات کے خاتمے سے متعلق اہم کیس کو باقاعدہ سماعت کے لیے مقرر کر دیا ہے۔ اس کیس کی خاص بات یہ ہے کہ اس کے ساتھ ہی سندھ کے صوبائی رہنما سعید غنی کے خلاف دائر توہینِ عدالت کی درخواست پر بھی سماعت کی جائے گی۔
ذرائع کے مطابق، سعید غنی کے خلاف توہینِ عدالت کی یہ درخواست سال 2019 میں عدالتی احکامات کی مبینہ حکم عدولی پر دائر کی گئی تھی، جسے اب طویل عرصے بعد دوبارہ سماعت کے لیے کاز لسٹ میں شامل کیا گیا ہے۔ اس کیس کی سماعت جسٹس عامر فاروق کی سربراہی میں قائم دو رکنی بینچ کرے گا۔عدالت نے اس معاملے کی سماعت کے لیے 30 اپریل کی تاریخ مقرر کی ہے۔ عدالت کی جانب سے تمام متعلقہ فریقین کو باقاعدہ نوٹسز جاری کر دیے گئے ہیں تاکہ وہ مقررہ تاریخ پر اپنا موقف پیش کر سکیں۔
واضح رہے کہ کراچی میں تجاوزات کا خاتمہ ایک دیرینہ اور پیچیدہ مسئلہ رہا ہے، جس پر عدالتِ عظمیٰ اور دیگر اعلیٰ عدالتیں متعدد بار سخت احکامات جاری کر چکی ہیں۔ اس کیس میں نہ صرف تجاوزات کی موجودہ صورتحال بلکہ اس حوالے سے سرکاری حکام اور اداروں کی کارکردگی کا بھی تفصیلی جائزہ لیا جائے گا۔