پاکستان نے متحدہ عرب امارات کا 3.45 ارب ڈالر کا تمام قرض ادا کر دیا، اسٹیٹ بینک

کراچی: اسٹیٹ بینک آف پاکستان نے بیرونی ادائیگیوں کے حوالے سے ایک اہم سنگ میل عبور کرتے ہوئے متحدہ عرب امارات (UAE) کو تمام واجب الادا ڈپازٹس کی واپسی مکمل کر دی ہے۔ مرکزی بینک کے مطابق، 23 اپریل کو ابوظہبی فنڈ فار ڈویلپمنٹ کو ایک ارب امریکی ڈالر کی آخری قسط واپس کر دی گئی ہے۔

واضح رہے کہ پاکستان نے قرضوں کی واپسی کے اپنے عزم کو پورا کرتے ہوئے گزشتہ ہفتے بھی 2.45 ارب ڈالر کی رقم ادا کی تھی۔ اس تازہ ترین ادائیگی کے بعد متحدہ عرب امارات کو مجموعی طور پر 3.45 ارب ڈالر کے تمام ڈپازٹس کی واپسی کا عمل کامیابی سے مکمل ہو گیا ہے۔ معاشی ماہرین اس بروقت ادائیگی کو بین الاقوامی مالیاتی اداروں اور دوست ممالک کے سامنے پاکستان کی ساکھ بہتر بنانے کے لیے ایک مثبت قدم قرار دے رہے ہیں۔