اسپیس ایکس نے پاکستانی نوجوان کی اے آئی کمپنی 60 ارب ڈالر میں خریدنے کی آفر کردی

اسپیس ایکس نے پاکستانی نوجوان صالح آصف کی مشترکہ مصنوعی ذہانت کی کمپنی کے ساتھ بڑے پیمانے پر شراکت یا ممکنہ خریداری کا اعلان کیا ہے، جس کی مالیت ساٹھ ارب ڈالر تک پہنچ سکتی ہے۔

کمپنی کے مطابق کرسر اے آئی کے ساتھ معاہدے کے تحت دونوں ادارے جدید کوڈنگ اور ڈیجیٹل ذہانت کے نظام کو مزید مؤثر بنانے پر مشترکہ طور پر کام کریں گے۔ اس تعاون کے نتیجے میں اسپیس ایکس کے بڑے سپرکمپیوٹنگ وسائل تک کرسر کو رسائی حاصل ہوگی۔

اعلامیے میں بتایا گیا ہے کہ اگر مکمل خریداری نہ ہو تو اسپیس ایکس اس شراکت کے بدلے دس ارب ڈالر کی ادائیگی کرے گا، تاکہ دونوں ادارے مل کر جدید مصنوعی ذہانت کے ماڈلز تیار کر سکیں۔

بین الاقوامی میڈیا کے مطابق کرسر اے آئی اس وقت عالمی سطح پر نمایاں کمپنیوں میں شامل ہے، جو بڑی ٹیکنالوجی کمپنیوں کے سافٹ ویئر ڈیولپمنٹ سسٹمز میں استعمال ہو رہی ہے۔

رپورٹس کے مطابق اس کمپنی کی سالانہ آمدن ایک ارب ڈالر سے زائد ہے جبکہ اس کی تیزی سے بڑھتی ہوئی کامیابی نے اسے عالمی اے آئی مارکیٹ میں نمایاں مقام دلا دیا ہے۔