امریکی صدر کو جنگ جاری رکھنے کیلئے کانگریس کی منظوری لینے میں ایک ہفتہ رہ گیا

امریکا کے صدر ڈونلڈ ٹرمپ کو جنگ جاری رکھنے کے لیے کانگریس سے منظوری حاصل کرنے میں صرف ایک ہفتہ رہ گیا ہے۔

قانون کے تحت صدر کانگریس کی اجازت کے بغیر جنگ کا آغاز تو کرسکتا ہے، تاہم اسے ساٹھ دن کے اندر اندر اس کی منظوری لینا لازمی ہوتی ہے۔ ذرائع کے مطابق اس مدت کے اختتام میں اب محدود وقت باقی رہ گیا ہے، جس کے باعث سیاسی دباؤ میں اضافہ دیکھا جا رہا ہے۔

غیر ملکی میڈیا کا کہنا ہے کہ امریکا میں جنگ کے حق میں عوامی حمایت تیزی سے کم ہو رہی ہے، جبکہ امریکی فوج نے جنگی اخراجات کیلئے مزید دو سو ارب ڈالرز کی طلب بھی سامنے رکھ دی ہے۔

یاد رہے کہ آٹھ اپریل کو جنگ کے چالیس روز مکمل ہونے کے بعد پاکستان کی ثالثی سے دو ہفتوں کی جنگ بندی عمل میں آئی تھی، تاہم تہران اور واشنگٹن کے درمیان مذاکرات کا پہلا دور بے نتیجہ رہا۔

صدر ڈونلڈ ٹرمپ نے یکطرفہ طور پر جنگ بندی میں توسیع کرتے ہوئے کہا ہے کہ ان کی انتظامیہ اسلام آباد میں دوسرے مرحلے کے مذاکرات کیلئے ایران کی جانب سے جواب کی منتظر ہے، تاہم تہران نے تاحال آمادگی ظاہر نہیں کی اور حکام نے امریکی مطالبات اور بحری ناکہ بندی کو بڑی رکاوٹ قرار دیا ہے۔