ایران کے ساتھ جنگ بندی میں توسیع پر وقت کی کوئی قید نہیں، ٹرمپ

امریکی صدرڈونلڈ ٹرمپ نے کہا ہے کہ ایران کے ساتھ جنگ بندی میں توسیع کے معاملے پر وقت کی کوئی قید نہیں۔ایک امریکی ٹی وی سے گفتگو کرتےہوئے صدرڈونلڈ ٹرمپ نے بتایا کہ وہ تنازع کے خاتمے کے لیے کسی عجلت میں نہیں اور ایک بہترین معاہدہ چاہتے ہیں۔

اس سے پہلے ٹرمپ نے کہا کہ فوج کو ہدایت دے دی ہے کہ ناکہ بندی جاری رکھی جائے اور ہر ممکن صورتحال سے نمٹنے کے لیے تیار رہے۔ڈونلڈ ٹرمپ کے مطابق جنگ بندی کو اس وقت تک بڑھایا جا رہا ہے جب تک ایران اپنی تجاویز پیش نہیں کر دیتا، انہوں نے اس پیش رفت کو ایران کے ساتھ مذاکرات کے دوسرے دور کے لیے مثبت قراردیا۔

اس سے قبل وائٹ ہاؤس کی پریس سیکریٹری کیرولین لیویٹ نے میڈیا کے نمائندوں سے گفتگو کے دوران کہا تھا کہ جنگ بندی کے لیے کوئی حتمی مدت مقرر نہیں کی گئی۔لیویٹ نے جنگ بندی میں تین سے پانچ دن کی توسیع سے متعلق خبروں کو غلط قرار دیا۔وائٹ ہاؤس کی پریس سیکریٹری کا کہنا تھا کہ صدر ٹرمپ نے کوئی ڈیڈ لائن مقرر نہیں کی وہ بحری ناکہ بندی سے مطمئن ہیں اور سمجھتے ہیں کہ ایران اس وقت بہت کمزور پوزیشن میں ہے۔