فٹبال ورلڈ کپ 2026: ایران نے شرکت اور مکمل تیاری کا اعلان کردیا

ایران نے فٹبال کے عالمی کپ دو ہزار چھبیس میں شرکت کی تصدیق کرتے ہوئے کہا ہے کہ قومی ٹیم ایونٹ کیلئے بھرپور تیاری مکمل کر چکی ہے اور عالمی سطح پر بہترین کارکردگی دکھانے کیلئے پرعزم ہے۔

میڈیا رپورٹس کے مطابق ایرانی حکام نے واضح کیا ہے کہ ٹیم کی تیاریوں کو مکمل کر لیا گیا ہے اور کھلاڑی عالمی مقابلوں کیلئے ذہنی اور جسمانی طور پر تیار ہیں۔

حکومتی ترجمان فاطمہ مہاجرانی کا کہنا ہے کہ وزارت کھیل و نوجوانان نے وزیر کھیل کی ہدایات کے تحت تمام انتظامات مکمل کیے تاکہ ٹیم کو اعلیٰ معیار کی سہولیات فراہم کی جا سکیں۔

عالمی فٹبال تنظیم کے سربراہ جیانی انفانتینو بھی اس بات کی تصدیق کر چکے ہیں کہ ایران ایونٹ میں شرکت کرے گا اور کھلاڑی اپنے ملک کی نمائندگی کیلئے تیار ہیں۔

واضح رہے کہ عالمی کپ دو ہزار چھبیس کی میزبانی امریکا، میکسیکو اور کینیڈا مشترکہ طور پر کریں گے۔ ایونٹ چھ جون سے شروع ہو کر گیارہ جولائی تک جاری رہے گا۔

ایران کو گروپ جی میں شامل کیا گیا ہے جہاں اس کا مقابلہ بیلجیئم، مصر اور نیوزی لینڈ سے ہوگا۔ ایرانی ٹیم کے تمام گروپ میچ امریکا میں شیڈول ہیں۔

یہ بھی قابل ذکر ہے کہ ایران کی شرکت پر اس وقت سوالات اٹھے تھے جب خطے میں کشیدگی بڑھی، تاہم اب صورتحال واضح ہو چکی ہے اور ایران ایونٹ میں شرکت کرے گا۔ اس بار عالمی کپ میں پہلی مرتبہ اڑتالیس ٹیمیں حصہ لیں گی۔