مفتی عبدالقوی ڈانس پارٹی میں نظر آ گئے، ویڈیو وائرل

متنازع مذہبی شخصیت اور سابق رکنِ رویتِ ہلال کمیٹی مفتی عبدالقوی ایک بار پھر سوشل میڈیا پر شدید تنقید کی زد میں ہیں، جہاں ان کی ایک مبینہ ‘ریو پارٹی’ (Rave Party) میں شرکت کی ویڈیو تیزی سے وائرل ہو رہی ہے۔ مفتی عبدالقوی، جو پہلے ہی قندیل بلوچ سکینڈل، حریم شاہ کے ساتھ تنازعات اور حج سے متعلق بیانات کی وجہ سے شہرت رکھتے ہیں، اب ایک ایسی محفل میں دیکھے گئے ہیں جہاں تیز ڈی جے میوزک اور مغربی طرز کے رقص و سرود کا شور تھا۔ وائرل ویڈیو میں وہ اپنے روایتی لباس میں موجود ہیں جبکہ اردگرد کے شرکاء موسیقی کی دھنوں پر ان کی موجودگی کا مذاق بناتے اور اشارے کرتے نظر آئے۔

سوشل میڈیا پر اس ویڈیو کے سامنے آتے ہی صارفین نے شدید غم و غصے اور طنز کا اظہار کیا۔ کئی صارفین کا کہنا ہے کہ ایک مذہبی لبادے میں ملبوس شخص کے لیے ایسی جگہوں پر موجودگی اخلاقی اور مذہبی اقدار کے منافی ہے۔ انٹرنیٹ صارفین نے جہاں ان کے ماضی کے سکینڈلز کو یاد کیا، وہیں کچھ نے طنزیہ تبصرے بھی کیے، جن میں سے ایک صارف کا کہنا تھا کہ “جی ٹی اے 6 (GTA 6) کی ریلیز سے پہلے مفتی صاحب کو ریو پارٹی میں دیکھنا ایک انوکھا تجربہ ہے”۔