پاکستان میں ایچ آئی وی عام آبادی تک پہنچ گیا، متاثرہ افراد کی تعداد 3 لاکھ 70 ہزار ہوگئی

اسلام آباد: پاکستان میں ایچ آئی وی کے کیسز میں تشویشناک اضافہ دیکھنے میں آ رہا ہے اور ماہرین صحت نے خبردار کیا ہے کہ یہ مرض مخصوص گروہوں سے نکل کر اب عام آبادی تک پھیل رہا ہے۔

ماہرین کے مطابق ملک بھر میں ایچ آئی وی سے متاثرہ افراد کی تعداد تقریباً 3 لاکھ 70 ہزار تک پہنچ چکی ہے جبکہ 79 فیصد افراد اپنی بیماری سے لاعلم ہیں، جو صورتحال کو مزید خطرناک بنا رہی ہے۔

سابق وفاقی وزیر صحت ڈاکٹر ظفر مرزا نے کہا ہے کہ بچوں میں بڑھتے ہوئے کیسز صحت کے نظام کی ناکامی کو ظاہر کرتے ہیں، ان کے مطابق اب یہ بیماری عام افراد اور بچوں میں بھی تیزی سے پھیل رہی ہے۔

طبی ماہرین نے غیر محفوظ انجیکشنز اور آلودہ خون کو اس پھیلاؤ کی بڑی وجوہات قرار دیا، جبکہ  بار بار ہونے والے پھیلاؤ کے واقعات نظام صحت کی کمزوری کو ظاہر کرتے ہیں۔

ماہرین صحت نے زور دیا ہے کہ بلڈ بینکوں کی سخت نگرانی، خون کی مکمل جانچ، غیر محفوظ انجیکشنز کے خاتمے اور انفیکشن کنٹرول کے مؤثر اقدامات فوری طور پر کیے جائیں، بصورت دیگر صورتحال مزید سنگین ہو سکتی ہے۔