دنیا کو بدلنے کیلئے وسائل نہیں بلکہ بڑے خیالات درکار ہوتے ہیں: مریم نواز شریف

وزیراعلیٰ پنجاب مریم نواز شریف نے عالمی یومِ تخلیق و جدت (World Creativity and Innovation Day) کے موقع پر اپنے خصوصی پیغام میں اس عزم کا اظہار کیا ہے کہ دنیا کو بدلنے کے لیے بڑے وسائل سے زیادہ بڑے خیالات کی ضرورت ہوتی ہے۔ انہوں نے کہا کہ انسانی ترقی اور پیچیدہ مسائل کے حل کے لیے تخلیقی سوچ اور دوسروں کے خیالات کو اہمیت دینا ناگزیر ہے، کیونکہ ٹیم ورک اور وسعتِ نظری ہی جدت کو فروغ دیتی ہے۔ وزیراعلیٰ نے خاص طور پر نوجوانوں کی صلاحیتوں پر اعتماد کا اظہار کرتے ہوئے کہا کہ پاکستان کے نوجوان ای کامرس اور آرٹیفیشل انٹیلیجنس کے میدان میں نمایاں خدمات سرانجام دے رہے ہیں، اور حکومت پنجاب ان باصلاحیت نوجوانوں کے لیے انفارمیشن ٹیکنالوجی اور اے آئی کے شعبوں میں عملی اقدامات کر رہی ہے۔

مریم نواز شریف نے پنجاب میں جاری جدید منصوبوں کی تفصیلات بتاتے ہوئے کہا کہ لاہور میں صوبے کی تاریخ کا پہلا ‘نواز شریف آئی ٹی سٹی’ قائم کیا جا رہا ہے، جبکہ گوگل کے تعاون سے ایک لاکھ سے زائد طلبہ کے لیے مفت بین الاقوامی سرٹیفکیشن کورسز کا آغاز بھی کر دیا گیا ہے۔ انہوں نے مزید کہا کہ تعلیم اور صحت کے محکموں میں سمارٹ آئی ٹی سسٹمز متعارف کروائے جا رہے ہیں تاکہ سرکاری امور میں شفافیت اور تیزی لائی جا سکے۔ ٹرانسپورٹ کے شعبے میں جدت کا ذکر کرتے ہوئے انہوں نے الیکٹرک بسوں کے اجراء اور لاہور سے راولپنڈی کے درمیان تیز رفتار ٹرین کے منصوبے کو پنجاب کے سفری کلچر میں ایک بڑے انقلاب کا پیش خیمہ قرار دیا، جو شہریوں کو جدید اور آرام دہ سفری سہولیات فراہم کرے گا۔