لبنان اور اسرائیل کے درمیان امریکا میں مذاکرات پر اتفاق

امریکی ثالثی میں ہونے والے مذاکرات سے قبل لبنان اور اسرائیل کے درمیان پہلا باقاعدہ رابطہ ہوا ہے، جس میں دونوں ممالک نے منگل کو امریکہ میں ملاقات کرنے پر اتفاق کیا ہے۔ لبنانی ایوانِ صدر کے مطابق، یہ ابتدائی گفتگو واشنگٹن میں تعینات دونوں ممالک کے سفیروں کے ذریعے ہوئی ہے، جسے حالیہ شدید کشیدگی کے بعد ایک بڑی سفارتی پیش رفت قرار دیا جا رہا ہے۔ امریکی وزارتِ خارجہ میں ہونے والی اس میٹنگ کا بنیادی ایجنڈا جنگ بندی کی شرائط اور باقاعدہ مذاکرات کی تاریخ طے کرنا ہے۔ اس حوالے سے امریکہ اور لبنان نے مشترکہ طور پر اسرائیل سے درخواست کی ہے کہ وہ حزب اللہ پر حملوں میں عارضی وقفہ کرے۔

دوسری جانب، لبنان کی مزاحمتی تنظیم حزب اللہ نے ایک بیان جاری کرتے ہوئے دعویٰ کیا ہے کہ دشمن (اسرائیل) نے مذاکرات کے لیے ایران کی جانب سے پیش کردہ شرائط کو “رسوائی” کے ساتھ قبول کر لیا ہے۔ تاہم، واشنگٹن میں متعین اسرائیلی سفیر نے واضح کیا ہے کہ اسرائیل لبنان اور امریکہ کے سفیروں کے ساتھ میٹنگ پر تو رضامند ہے، لیکن وہ فی الحال حزب اللہ کے ساتھ براہِ راست جنگ بندی پر بات چیت کرنے کا ارادہ نہیں رکھتا۔

مذاکرات کا یہ نیا موڑ ایک ایسے وقت میں سامنے آیا ہے جب جنگ بندی معاہدے کی دائرہ کار پر عالمی سطح پر بحث جاری ہے۔ اس سے قبل امریکہ اور اسرائیل کا موقف تھا کہ لبنان، ایران جنگ بندی معاہدے کا حصہ نہیں ہے، جبکہ ایران اور یورپی یونین، برطانیہ، فرانس اور آسٹریلیا سمیت کئی عالمی طاقتوں نے اس بات پر زور دیا تھا کہ خطے میں پائیدار امن کے لیے لبنان کو بھی اس معاہدے کا لازمی حصہ ہونا چاہیے۔ منگل کو ہونے والی یہ ملاقات اس ابہام کو دور کرنے اور مستقبل کے امن عمل کی سمت متعین کرنے میں کلیدی کردار ادا کرے گی۔