جاگیرداروں اور وڈیروں کو کارپوریٹ سسٹم سے نکال باہر پھیکنیں گے،حافظ نعیم الرحمان

انہوں نے زور دیا کہ جاگیرداروں اور وڈیروں کو اپنے سروں پر بٹھا کر تبدیلی کا نعرہ نہیں لگایا جا سکتا۔ گریٹر اقبال پارک، مینارِ پاکستان لاہور میں خطاب کے دوران حافظ نعیم الرحمن نے کہا کہ آئین و دستور کے مطابق حاکمیت صرف اللہ تعالیٰ کی ہے اور انسانوں کا کام صرف نیابت کرنا ہے۔ کسی کو اختیار نہیں کہ زمین پر خدا بن کر ظلم کرے۔

انہوں نے کہا کہ اللہ کی حاکمیت کے مطابق ہر شخص، چاہے صدر ہو یا آرمی چیف، برابر ہوگا۔ امیر جماعت اسلامی نے ملکی حکمرانوں پر تنقید کرتے ہوئے کہا کہ وہ امریکہ سے ڈرتے ہیں اور فلسطینی مسلمانوں کی لاشوں کے عوض اس کے غلام بنے ہوئے ہیں۔ انہوں نے کہا کہ عوام کو ایسے قیادت کی ضرورت ہے جو اصولی موقف پر قائم ہو اور عوام کے ساتھ ہو۔ حافظ نعیم الرحمن نے کہا کہ جماعت اسلامی واحد جماعت ہے جس میں جمہوریت موجود ہے، اور خاندان، وصیت یا وراثت پر چلنے والی پارٹیاں کبھی انقلاب نہیں لا سکتیں۔

کارکنان کو ہدایت دی کہ وہ “بدل دو نظام” کے نعرے کو عام کریں اور تمام عوام کو اپنے ساتھ شامل کریں، چاہے وہ کسی بھی پارٹی کے کارکن ہوں۔ امیر جماعت اسلامی نے تعلیم، مزدوروں اور خواتین کے حقوق پر زور دیا اور کہا کہ حکمران عوام کو تعلیم اور بنیادی حقوق دینے کی بجائے ذاتی مفاد میں مصروف ہیں۔ انہوں نے پنجاب اور سندھ میں اختیارات کی نچلی سطح پر منتقلی، ظلم کے نظام کے خاتمے اور اجارہ داری ختم کرنے کی ضرورت پر بھی روشنی ڈالی۔

حافظ نعیم الرحمن نے کہا کہ پاکستان میں 2 کروڑ 62 لاکھ بچے تعلیم سے محروم ہیں اور ملک میں حکمران قوم کو جاہل بنا کر اقتدار کے مزے لے رہے ہیں۔ انہوں نے کہا کہ جماعت اسلامی “بنو قابل” پروگرام کے تحت عوام میں شعور پیدا کر رہی ہے اور آئندہ گراس روٹ لیول تک اختیارات منتقل کرے گی۔