پنجاب میں فضائی آلودگی برقرار، قصور سب سے آلودہ شہر قرار، لاہور دنیا میں دوسرے نمبر پر

حکومتی اقدامات کے باوجود پنجاب میں فضائی آلودگی کی صورتحال میں بہتری نہ آسکی۔ صوبے بھر میں ایئر کوالٹی انڈیکس خطرناک حد تک بڑھ گیا ہے، جبکہ قصور 500 ایئر پارٹیکولیٹ میٹرز کے ساتھ پنجاب کا سب سے آلودہ شہر قرار پایا ہے۔

محکمہ ماحولیات پنجاب کی ویب سائٹ کے مطابق خانیوال میں اے کیو آئی 365 اور صوبائی دارالحکومت لاہور میں 353 ریکارڈ کیا گیا۔ فضائی آلودگی کے اس بڑھتے ہوئے رجحان نے شہریوں کی صحت کو شدید خطرات سے دوچار کردیا ہے۔

عالمی رینکنگ میں بھی صورتحال تشویش ناک ہے۔ ایک بین الاقوامی ویب سائٹ کے مطابق دنیا کے آلودہ ترین شہروں کی فہرست میں لاہور 368 اے کیو آئی کے ساتھ دوسرے نمبر پر موجود ہے جبکہ کراچی 209 پارٹیکولیٹ میٹرز کے ساتھ چھٹے نمبر پر ہے۔

ماہرین کے مطابق فوری اور موثر اقدامات کے بغیر خطے میں اسموگ اور آلودگی کے اثرات مزید سنگین ہوسکتے ہیں۔