پی ایس ایل 11: کراچی کنگز اور کوئٹہ گلیڈی ایٹرز آج مدمقابل ہوں گے

لاہور: پاکستان سپر لیگ (PSL) کے گیارہویں ایڈیشن کا دوسرا میچ آج روایتی حریفوں، کراچی کنگز اور کوئٹہ گلیڈی ایٹرز کے درمیان قذافی سٹیڈیم لاہور میں کھیلا جائے گا۔ پاکستانی وقت کے مطابق شام 7 بجے شروع ہونے والے اس میچ میں شائقینِ کرکٹ کو ایک سنسنی خیز مقابلہ دیکھنے کو ملے گا، تاہم سیکیورٹی اور انتظامی فیصلوں کے تحت یہ میچ بھی خالی اسٹیڈیم میں کھیلا جائے گا۔

کراچی کنگز کی قیادت اس بار آسٹریلوی اسٹار ڈیوڈ وارنر کر رہے ہیں، جبکہ کوئٹہ گلیڈی ایٹرز کے کپتان سعود شکیل ہیں۔ دونوں ٹیموں کے درمیان اب تک پی ایس ایل کی تاریخ میں 20 مقابلے ہوئے ہیں، جن میں کوئٹہ کا پلہ بھاری رہا ہے۔ کوئٹہ نے 13 میچوں میں فتح حاصل کی ہے جبکہ کراچی کنگز صرف 7 بار کامیاب ہو سکی ہے۔

واضح رہے کہ گزشتہ روز ایونٹ کے افتتاحی میچ میں دفاعی چیمپئن لاہور قلندرز نے حیدرآباد کنگزمین کو 69 رنز کے واضح مارجن سے شکست دے کر فاتحانہ آغاز کیا تھا۔ پی ایس ایل 11 کے تمام میچز بغیر شائقین کے لاہور اور کراچی کے مخصوص وینیوز پر منعقد کیے جا رہے ہیں تاکہ کھلاڑیوں کی حفاظت اور ایونٹ کے تسلسل کو یقینی بنایا جا سکے۔