ٹرمپ سے زیادہ ایران کی باتوں پر یقین کرتا ہوں، سابق سربراہ سی آئی اے

واشنگٹن: سی آئی اے کے سابق سربراہ جان برینن نے امریکی صدر ڈونلڈ ٹرمپ کے خلاف ایک سخت بیان جاری کرتے ہوئے کہا ہے کہ وہ صدر ٹرمپ کے مقابلے میں ایران کی باتوں پر زیادہ یقین رکھتے ہیں۔ اپنے حالیہ بیان میں جان برینن نے صدر ٹرمپ پر حقائق کو مسخ کرنے کا الزام عائد کرتے ہوئے کہا کہ حقائق بار بار سامنے آنے کے باوجود صدر انہیں تسلیم کرنے سے انکاری ہیں۔

سابق سی آئی اے چیف نے صدر ٹرمپ کے ان دعوؤں کی تردید کی کہ ایران امریکی شرائط پر مذاکرات کے لیے تیار ہے۔ ان کا کہنا تھا کہ ٹرمپ اس وقت اپنی ہی پالیسیوں کے نتیجے میں پیدا ہونے والی “تخلیق کردہ شکست” سے جان چھڑانے کی کوشش کر رہے ہیں اور وہ غلط بیانی سے کام لے رہے ہیں۔

جان برینن کا یہ بیان ایک ایسے وقت میں سامنے آیا ہے جب خطے میں ایران اور امریکہ کے درمیان تناؤ بڑھ رہا ہے اور اسلام آباد میں ممکنہ مذاکرات کی خبریں زیرِ گردش ہیں۔ دفاعی ماہرین برینن کے اس بیان کو امریکی انٹیلی جنس بیوروکریسی اور وائٹ ہاؤس کے درمیان بڑھتے ہوئے اختلافات کے طور پر دیکھ رہے ہیں