فرانس: عمر یعقوب نے پہلے پاکستانی نژاد مئیر منتخب ہوکر تاریخ رقم کردی

پیرس: فرانس کے نواحی شہر کرائی میں بلدیاتی انتخابات کے دوسرے مرحلے میں پاکستانی نژاد عمر یعقوب کامیابی حاصل کرتے ہوئے مئیر منتخب ہوگئے۔

عمر یعقوب نے 51 فیصد سے زائد ووٹ لے کر اپنے حریفوں کو شکست دی اور اس طرح وہ فرانس میں مئیر منتخب ہونے والے پہلے پاکستانی نژاد شہری بن گئے ہیں۔

ان کا تعلق لاہور سے ہے جبکہ ان کی والدہ فیصل آباد سے تعلق رکھتی ہیں۔ اس کامیابی پر پاکستانی کمیونٹی میں خوشی کی لہر دوڑ گئی اور مختلف تقریبات میں اس کامیابی کو بھرپور انداز میں سراہا گیا۔

عمر یعقوب کی والدہ نے اس موقع پر اظہار خیال کرتے ہوئے کہا کہ وہ ان تمام افراد کی شکر گزار ہیں جنہوں نے ان کے بیٹے پر اعتماد کیا اور اس کی حمایت کی۔

پیرس کے نواحی علاقے کرائی میں اس کامیابی کے بعد جشن کا ماحول ہے اور اسے پاکستانی کمیونٹی کے لیے ایک تاریخی لمحہ قرار دیا جا رہا ہے۔