ایران کے خلاف جنگ کے اہداف میں کسی قسم کی تبدیلی نہیں آئی، امریکی وزیردفاع

امریکی وزیرِ دفاع پیٹ ہیگستھ نے کہا ہے کہ ایران کے خلاف جنگ کے اہداف واضح ہیں اور ان میں کسی قسم کی کوئی تبدیلی نہیں آئی۔

جمعرات کوپنٹاگون میں  نیوز کانفرنس کرتے ہوئے پیٹ ہیگستھ کا کہنا تھا کہ  ایران کے میزائل لانچرز، دفاعی صنعت اور اس کی بحریہ کو تباہ کرنا امریکی اہداف میں شامل ہے جبکہ اس بات کو بھی یقینی بنانا ہے کہ ایران کبھی بھی جوہری ہتھیار حاصل نہ کرے۔

امریکی وزیرِ دفاع کا مزید کہنا تھا کہ ایران نے سرنگوں، راکٹوں، میزائلوں اور ڈرونز میں پیسہ بہایا ہے۔ لیکن امریکا ان کا بے رحمی سے شکار کر رہا ہے، ایسا دُنیا کی کوئی دوسری فوج نہیں کر سکتی۔

امریکی وزیر دفاع نے دعویٰ کیا کہ ایرانی بیلسٹک میزائل اور امریکی افواج کے خلاف یک طرفہ ڈرون حملوں میں تصادم کے آغاز کے بعد سے 90 فیصد کمی ہوئی ہے۔

پیٹ ہیگستھ کا مزید کہنا تھا کہ امریکہ نے ایرانی بحریہ کے کم از کم 120 بحری جہازوں کو نقصان پہنچایا ہے یا غرق کر دیا ہے۔

اس موقع پرجنگ کے حوالے سے تفصیلات بتاتے ہوئے جوائنٹ چیفس آف سٹاف کے چیئرمین جنرل ڈین کین نے بتایا کہ امریکا ایرانی ڈرونز کو ناکارہ بنانے کے لیے ایران کے اندر مشرق اور جنوب کے علاقوں میں کارروائیاں کر رہا ہے۔

اُن کا کہنا تھا کہ اس لڑائی میں شامل اپاچی ہیلی کاپٹر جنوبی ایران میں حملے اور ڈرونز کو نشانہ بنا رہے ہیں۔