ایران کے خلاف جنگ : امریکا نے کئی جدید ہتھیار پہلی مرتبہ استعمال کیے: رپورٹ

امریکا ایران کے خلاف جاری جنگ میں اپنے متعدد جدید ہتھیاروں کو پہلی بار عملی میدان میں آزما رہا ہے۔

رپورٹ کے مطابق امریکا نے گزشتہ کئی دہائیوں میں انسانی تاریخ کے انتہائی مہلک ہتھیار تیار کیے جن میں سے کئی کو اب ایران کے خلاف استعمال کیا جا رہا ہے۔

رپورٹ میں بتایا گیا ہے کہ اٹھائیس فروری کو شروع ہونے والے “آپریشن ایپک فیوری” کے بعد امریکا نے ایران کی فوجی صلاحیت کو کمزور کرنے کے لیے اربوں ڈالر مالیت کے مختلف ہتھیار استعمال کیے ہیں۔

ان میں بغیر پائلٹ طیارے، تارپیڈو، دور مار میزائل اور جدید جنگی طیارے شامل ہیں۔

جریدے کے مطابق اس جنگ میں استعمال ہونے والے امریکی لوکس بغیر پائلٹ طیارے طویل فاصلے تک حملہ کرنے کی صلاحیت رکھتے ہیں اور نسبتاً کم لاگت کے حامل ہیں جن کی قیمت تقریباً پینتیس ہزار ڈالر بتائی جاتی ہے۔

اسی طرح تقریباً پانچ سو کلو میٹر تک مار کرنے والا پی آر ایس میزائل بھی پہلی بار اس جنگ میں آزمایا جا رہا ہے جس کی قیمت تقریباً ڈیڑھ ملین ڈالر ہے۔

رپورٹ کے مطابق امریکا جدید اسٹیلتھ جنگی طیارے بھی استعمال کر رہا ہے جو کسی بھی جنگ میں پہلی بار میدان میں لائے گئے ہیں۔ یہ طیارے تقریباً بیس برس قبل تیار کیے گئے تھے مگر عملی استعمال اب کیا جا رہا ہے اور ایک طیارہ تیار کرنے پر تقریباً اسی ملین ڈالر خرچ آتا ہے۔

اس کے علاوہ امریکا ٹوما ہاک میزائل کے نئے نمونے بھی استعمال کر رہا ہے جس کی تیاری پر تقریباً دو ملین ڈالر لاگت آتی ہے۔

رپورٹ کے مطابق اس جنگ میں ایک طرف امریکا کی جدید فوجی طاقت ہے جبکہ دوسری جانب ایران کی مزاحمت اور بقا کی مضبوط خواہش نمایاں ہے۔