مشرقِ وسطیٰ میں کشیدگی، امریکا کا مزید جنگی جہاز اور 5 ہزار فوجی تعینات کرنے کا اعلان

مشرقِ وسطیٰ میں بڑھتی ہوئی کشیدگی کے پیش نظر امریکا نے خطے میں مزید جنگی جہاز اور پانچ ہزار فوجیوں کو تعینات کرنے کا اعلان کر دیا ہے۔

امریکی اخبار کی ایک رپورٹ کے مطابق امریکی محکمہ دفاع نے ہزاروں میرینز کو مشرقِ وسطیٰ بھیجنے کا فیصلہ کیا ہے۔ رپورٹ میں کہا گیا ہے کہ یہ اقدام امریکی مرکزی کمان کی درخواست پر کیا جا رہا ہے۔

رپورٹ کے مطابق یہ درخواست ایسے وقت میں کی گئی ہے جب ایران کی جانب سے آبنائے ہرمز میں جہازوں پر حملوں اور بارودی سرنگیں بچھانے کے اقدامات کی اطلاعات سامنے آ رہی ہیں۔

اخبار کے مطابق پانچ ہزار میرینز اور بحریہ کے اہلکاروں کے ساتھ متعدد جنگی بحری جہاز بھی خطے میں تعینات کیے جائیں گے۔

واضح رہے کہ آبنائے ہرمز دنیا کے کئی ممالک کے لیے تیل کی ترسیل کا نہایت اہم راستہ ہے اور اس راستے میں کسی بھی رکاوٹ کے باعث عالمی سطح پر تیل اور گیس کی قیمتوں میں تیزی سے اضافہ دیکھا جا رہا ہے۔

گزشتہ روز ایران کے نومنتخب سپریم لیڈر مجتبیٰ خامہ ای نے اپنے پہلے پیغام میں آبنائے ہرمز بند رکھنے کا اعلان کیا تھا۔

انہوں نے کہا کہ ایران کی زمینی اور سمندری سرحدیں پندرہ ممالک سے ملتی ہیں اور ایران ہمیشہ ان کے ساتھ خوشگوار اور تعمیری تعلقات کا خواہاں رہا ہے۔

مجتبیٰ خامنہ ای کا مزید کہنا تھا کہ حالیہ جارحیت میں کچھ فوجی اڈے استعمال کیے گئے جن کے بارے میں پہلے خبردار کیا جا چکا تھا، اسی لیے ایران نے صرف انہی فوجی اڈوں کو نشانہ بنایا جو دشمن کے زیر استعمال تھے اور آئندہ بھی یہی حکمت عملی اختیار کی جائے گی۔