تہران میں زور دار دھماکا، القدس ریلی کے شرکاء بے خوف آگے بڑھتے رہے

ایران کے دارالحکومت تہران میں یومِ القدس کے موقع پر فلسطینی عوام سے اظہارِ یکجہتی کے لیے نکالی گئی ریلی کے دوران ایک زوردار دھماکا ہوا ہے، تاہم شرکاء نے خوفزدہ ہونے کے بجائے نعرے لگاتے ہوئے اپنا مارچ جاری رکھا۔ یہ واقعہ تہران کے مرکز میں واقع فردوسی اسکوائر اور انقلاب اسٹریٹ کے قریب اس وقت پیش آیا جب وہاں مظاہرین کی بڑی تعداد موجود تھی۔ سرکاری میڈیا کی جانب سے جاری کردہ فوٹیج میں دھماکے کے بعد دھوئیں کے بادل اٹھتے دیکھے جا سکتے ہیں، مگر مظاہرین کے جذبے میں کوئی کمی نہیں آئی۔

یہ دھماکا اسرائیل کی جانب سے علاقے میں ممکنہ حملے کی وارننگ کے کچھ دیر بعد ہوا، تاہم ابتدائی طور پر کسی جانی نقصان کی اطلاع نہیں ملی۔ ریلی میں ایران کے قومی سلامتی ادارے کے سربراہ علی لاریجانی اور پولیس چیف احمد رضا رادان سمیت اعلیٰ حکام نے شرکت کی۔ علی لاریجانی نے حملے پر ردعمل دیتے ہوئے کہا کہ مظاہرین کو نشانہ بنانا دشمن کی ناکامی اور مایوسی کی علامت ہے۔ واضح رہے کہ یومِ القدس کے موقع پر ایران کے تمام چھوٹے بڑے شہروں میں لاکھوں افراد سڑکوں پر نکل کر اسرائیل کے خلاف اور فلسطینیوں کی حمایت میں نعرے لگا رہے ہیں۔