اسرائیل پر تازہ میزائل حملوں میں درجنوں افراد زخمی، متاثرہ علاقوں میں شہریوں کو انخلا کی ہدایت

اسرائیل کے شمالی حصے میں میزائل حملوں کے دوران درجنوں افراد زخمی ہو گئے ہیں، جس کے بعد متاثرہ علاقوں میں شہریوں کو فوری انخلا کی ہدایات جاری کر دی گئی ہیں۔

میڈیا رپورٹس کے مطابق جمعے کی علی الصبح ایک گاؤں پر میزائل گرنے سے 58 افراد زخمی ہوئے، جنہیں ناصرہ کے قریب اسپتالوں میں منتقل کیا گیا۔ زخمیوں میں ایک خاتون قدرے شدید جبکہ باقی افراد کو شیشے کے ٹکڑوں سے معمولی چوٹیں آئی ہیں۔

اسرائیلی فوج نے ہوم فرنٹ کمانڈ کے اہلکار جائے وقوع پر بھیج دیے اور فورسز، ہنگامی اور ریسکیو اداروں کے تعاون سے علاقے کو کلیئر کرنے کے اقدامات کر رہی ہیں۔ فوج کا کہنا ہے کہ ایران کی جانب سے اسرائیل کی طرف داغے گئے میزائلوں کو روکنے کی کوشش جاری ہے۔