کاجول نے ممبئی میں آفس لیز پر دے دیا، 9 سال میں کروڑوں کی کمائی متوقع

بالی ووڈ اسٹار کاجول نے ممبئی کے گوری گاؤں میں واقع اپنا دفتر 9 سال کی طویل مدت کے لیے لیز پر دے دیا ہے، جس سے انہیں کروڑوں روپے کی آمدنی حاصل ہوگی۔

بھارتی میڈیا رپورٹس کے مطابق کاجول نے یہ آفس اسپیس ماہانہ 6.9 لاکھ روپے کے کرائے پر لیز کیا ہے، جبکہ لیز کی مدت مکمل ہونے تک ان کی مجموعی آمدنی تقریباً 8.6 کروڑ روپے تک پہنچنے کا امکان ہے۔

یہ کمرشل پراپرٹی 1,817 اسکوائر فٹ کارپٹ ایریا پر مشتمل ہے، جس کے ساتھ ایک کار پارکنگ کی سہولت بھی شامل ہے۔

رپورٹس کے مطابق لیز ایگریمنٹ کا اطلاق رواں نومبر سے شروع ہورہا ہے۔ پہلے تین سال کرایہ 6.9 لاکھ روپے ماہانہ ہوگا، جس میں اگلے تین سال بعد 15 فیصد اضافہ ہوکر یہ رقم 7.9 لاکھ روپے ہو جائے گی۔ آخری تین سال کے دوران کرایہ مزید بڑھ کر 9.12 لاکھ روپے ماہانہ تک پہنچ جائے گا، جس سے لیز کی اختتامی مدت یعنی 2034 تک مجموعی آمدنی 8 کروڑ سے زائد ہو جائے گی۔

اداکارہ حال ہی میں ویب سیریز ’دی ٹرائل‘ سیزن 2 میں جلوہ گر ہوئیں، جسے ناظرین کی جانب سے مثبت پذیرائی ملی۔ تاہم ان کی پچھلی فلمیں ’سرزمین‘ اور ’ماں‘ باکس آفس پر خاطر خواہ کامیابی نہ حاصل کر سکیں۔

کاجول آئندہ برس 2026 میں فلم ’مہارانی‘ میں پربھو دیوا اور نصیرالدین شاہ کے ساتھ نظر آئیں گی، جبکہ وہ اس وقت ٹوئنکل کھنہ کے ساتھ ٹاک شو ’ٹو مچ ود کاجول اینڈ ٹوئنکل‘ کی شریک میزبان بھی ہیں۔