سعودی عرب نے شیبہ آئل فیلڈ کی جانب آنے والا ڈرون تباہ کر دیا

سعودی وزارت دفاع نے دعویٰ کیا ہے کہ شیبہ آئل فیلڈ کی جانب آنے والے ایک ڈرون کو فضائی دفاعی نظام نے تباہ کر دیا۔

سعودی وزارت دفاع کے مطابق فضائی دفاعی نظام نے بروقت کارروائی کرتے ہوئے ڈرون کو روک لیا۔ حکام کا کہنا ہے کہ ڈرون کو شیبہ کے اہم تیل ذخائر کو نشانہ بنانے کے لیے بھیجا گیا تھا تاہم فوری کارروائی کے باعث تیل تنصیبات کو ممکنہ نقصان سے بچا لیا گیا۔

دوسری جانب متحدہ عرب امارات نے بھی ایک روز کے دوران 10 بیلسٹک میزائل اور 26 ڈرون تباہ کرنے کا دعویٰ کیا ہے۔ اماراتی حکام کے مطابق یہ میزائل اور ڈرون ایران کی جانب سے داغے گئے تھے۔

اماراتی وزارت دفاع کے مطابق خطے میں کشیدگی کے آغاز سے اب تک 278 بیلسٹک میزائل اور 1540 ڈرون روکے جا چکے ہیں جبکہ حملوں کے نتیجے میں 6 افراد جاں بحق ہوئے ہیں۔ جاں بحق ہونے والوں میں اماراتی، پاکستانی، نیپالی اور بنگلہ دیشی شہری شامل ہیں۔