بیروت میں ایک ہوٹل پر اسرائیلی حملے میں ایران کے 4 سفارتکار شہید

لبنان کے دارالحکومت بیروت میں ایک ہوٹل پر اسرائیلی فضائی حملے کے نتیجے میں ایران کے 4 سفارتکار شہید ہو گئے۔

اقوام متحدہ میں ایران کے سفیر امیر سعید ایروانی نے بتایا کہ بیروت میں اسرائیلی حملے میں ایران کے 4 سفارتکار شہید ہوئے ہیں۔

ایرانی سفیر نے ایک ہنگامی خط کے ذریعے اقوام متحدہ کے سیکرٹری جنرل اور سلامتی کونسل و جنرل اسمبلی کے صدور کو آگاہ کیا کہ یہ سفارتکار 8 مارچ کو اسرائیل کی جانب سے بیروت کے ایک ہوٹل کو نشانہ بنانے والے حملے میں شہید ہوئے۔

ایرانی میڈیا کے مطابق شہید ہونے والوں میں سفارت خانے کے سیکنڈ اور تھرڈ سیکرٹری، ملٹری اتاشی اور ملٹری مشن آفیسر شامل ہیں۔

دوسری جانب لبنانی وزارتِ صحت کے مطابق وسطیٰ بیروت میں رمادا ہوٹل کے ایک اپارٹمنٹ کو نشانہ بنانے والے اسرائیلی حملے میں 4 افراد جاں بحق جبکہ 10 زخمی ہوئے۔