پیٹرولیم مصنوعات کی قیمتوں میں اضافے کے بعد انٹرسٹی بس کرایوں میں اضافہ

لاہور: پیٹرولیم مصنوعات کی قیمتوں میں حالیہ اضافے کے بعد ملک بھر میں ٹرانسپورٹ کے کرایوں میں بھی اضافہ کر دیا گیا ہے۔

ذرائع کے مطابق لاہور سے راولپنڈی کے لیے ایگزیکٹو بس کا کرایہ 2250 سے بڑھ کر 2480 روپے ہو گیا ہے جبکہ ایگزیکٹو پلس کا کرایہ 3350 سے بڑھ کر 3680 روپے کر دیا گیا ہے۔

اسی طرح لاہور سے کراچی کے لیے بس کرایہ 3 ہزار روپے اضافے کے ساتھ 13200 روپے ہو گیا ہے۔ لاہور سے مری کا کرایہ 3100 سے بڑھ کر 3720 روپے مقرر کیا گیا ہے۔

لاہور سے صادق آباد کا کرایہ 700 روپے اضافے کے ساتھ 4200 روپے ہو گیا جبکہ لاہور سے ملتان کا نیا کرایہ 3150 سے بڑھ کر 3750 روپے مقرر کیا گیا ہے۔

لاہور سے سیالکوٹ کا نیا کرایہ 1800 سے بڑھ کر 2150 روپے جبکہ لاہور سے پاکپتن کا کرایہ 350 روپے اضافے کے ساتھ 1750 روپے ہو گیا ہے۔
لاہور سے سرگودھا کے لیے بھی کرایہ 350 روپے اضافے کے بعد 2000 روپے مقرر کیا گیا ہے۔

یہ اضافہ پیٹرولیم مصنوعات کی قیمتوں میں حالیہ تبدیلی کے فوری اثرات کے پیش نظر کیا گیا ہے، جس سے مسافروں کے لیے سفر کے اخراجات میں اضافہ ہو گیا ہے۔