خوراک کی بلا تعطل فراہمی کے لیے امارات میں متبادل سپلائی چین فعال

اماراتی حکومت نے ملک میں خوراک کی بلا تعطل فراہمی کو یقینی بنانے کے لیے متبادل سپلائی چین فعال کر دیا ہے۔

حکام کے مطابق شارجہ کے خورفکان اور فجیرہ بندرگاہیں غذائی اشیاء کی درآمد کے لیے استعمال کی جا رہی ہیں، تاکہ آبنائے ہرمز کے موجودہ حالات کے دوران رسد میں خلل نہ آئے۔

فجیرہ پورٹ خطے میں نسبتاً محفوظ سمندری راستہ فراہم کرتا ہے، اور اسی لیے متبادل سمندری راستے فعال کیے گئے ہیں تاکہ ملک بھر میں ضروری اشیاء کی ترسیل برقرار رہے۔

خورفکان پورٹ کے ذریعے تجارتی سامان اور خوراک کی ترسیل میں اضافہ متوقع ہے، جبکہ فجیرہ بندرگاہ کے ذریعے فوری رسد کو یقینی بنایا جا رہا ہے۔

حکام نے بتایا کہ اماراتی ایئر کارگو نے ہنگامی بنیادوں پر خوراک کی فضائی ترسیل شروع کر دی ہے، اور ہائپر مارکیٹس نے ضروری اشیاء کی بروقت فراہمی کے لیے کارگو طیارے کرائے پر حاصل کیے ہیں۔

ابوظبی کے حکام کے مطابق ایئر کارگو کے عالمی نیٹ ورک کے ذریعے بحران کے دوران ضروری مال کی فوری ترسیل ممکن ہو گئی ہے، جس سے ملک میں خوراک کی کمی کو روکا جا سکتا ہے۔