طاقت کا استعمال مسائل کا حل نہیں، چین کا ایران پر حملے روکنے کا مطالبہ

چین نے ایران کے خلاف جاری فوجی کارروائیوں پر تشویش کا اظہار کرتے ہوئے حملے فوری طور پر روکنے اور تنازع کے پرامن حل کے لیے مذاکرات شروع کرنے کا مطالبہ کیا ہے۔

چین کے وزیر خارجہ وانگ ای نے کہا ہے کہ موجودہ جنگ ایک ایسا تنازع ہے جسے ابتدا ہی میں روک دیا جانا چاہیے تھا اور اب اس کے مزید پھیلاؤ کو روکنا عالمی برادری کی مشترکہ ذمہ داری ہے۔

انہوں نے کہا کہ طاقت کے استعمال سے مسائل حل نہیں ہوتے بلکہ کشیدگی میں اضافہ ہوتا ہے، اس لیے تمام فریقین کو صبر و تحمل کا مظاہرہ کرتے ہوئے بات چیت کا راستہ اختیار کرنا چاہیے۔

وانگ ای نے بڑی عالمی طاقتوں سے اپیل کی کہ وہ صورتحال کو مزید خراب ہونے سے بچانے کے لیے مثبت اور تعمیری کردار ادا کریں۔

چینی وزیر خارجہ نے اس بات پر بھی زور دیا کہ ایران اور خلیجی خطے کے ممالک کی خود مختاری اور سلامتی کا مکمل احترام کیا جانا چاہیے۔

انہوں نے کہا کہ خطے میں بڑھتی ہوئی کشیدگی کو روکنا ضروری ہے تاکہ جنگ کے دائرہ کار کو وسیع ہونے سے بچایا جا سکے اور امن و استحکام برقرار رکھا جا سکے۔