معاشی لائحہ عمل میں سادگی، بچت اور عوامی ریلیف ترجیح ہے: وزیراعظم

وزیراعظم محمد شہباز شریف کی زیر صدارت ملکی معاشی صورتحال کے جائزے کے لیے اہم اجلاس منعقد ہوا جس میں عالمی سطح پر حالیہ کشیدگی اور اس کے خطے پر پڑنے والے معاشی اثرات پر تفصیلی بریفنگ دی گئی۔

اجلاس کے دوران وزیراعظم نے کمیٹی کو ہدایت کی کہ 48 گھنٹوں کے اندر سادگی اور بچت پر مبنی ایسا قابلِ عمل لائحہ عمل پیش کیا جائے جس سے عوام پر کم سے کم بوجھ پڑے اور عوامی ریلیف کو اولین ترجیح دی جائے۔اجلاس میں بتایا گیا کہ وزیراعظم نے گزشتہ ہفتے ہی عالمی معاشی دباؤ کے اثرات کا جائزہ لینے کے لیے ایک کمیٹی تشکیل دی تھی، جس کے اقدامات کے باعث ملک میں پٹرولیم مصنوعات کی کمی پیدا نہیں ہوئی۔ تاہم عالمی سطح پر قیمتوں میں حالیہ اضافے کے باعث صارفین پر بوجھ کم سے کم منتقل کرنے کے لیے کمیٹی کی سفارشات کی روشنی میں پٹرولیم مصنوعات کی قیمتوں میں اضافہ کیا گیا۔وزیراعظم نے واضح ہدایت کی کہ کوئی بھی پیٹرول پمپ یا کمپنی جو مصنوعی قلت پیدا کرنے یا ذخیرہ اندوزی میں ملوث پائی جائے، اس کا لائسنس فوری طور پر منسوخ کیا جائے اور اس کے خلاف قانونی کارروائی عمل میں لائی جائے۔انہوں نے مزید ہدایت کی کہ وزیر خزانہ اور وزیر پٹرولیم چاروں صوبوں کا دورہ کریں اور صوبائی حکومتوں کے ساتھ مل کر پٹرولیم مصنوعات کی بچت اور بلاتعطل فراہمی کے لیے جامع منصوبہ بندی اور لائحہ عمل تیار کریں۔اجلاس میں کمیٹی کو مزید فعال کردار ادا کرتے ہوئے عوام کے لیے آسان اور مؤثر سفارشات پیش کرنے کی بھی ہدایت دی گئی۔