پاکستانی ٹینس کیلئے بڑی خوشخبری، 8 عہدیداران آئی ٹی ایف اور اے ٹی ایف کی کمیٹیوں میں شامل

پاکستان ٹینس کے لیے ایک بڑی خوشخبری سامنے آئی ہے جہاں 2026-27 کے لیے آٹھ پاکستانی عہدیداران کو انٹرنیشنل اور ایشیائی ٹینس فیڈریشن کی مختلف کمیٹیوں میں شامل کر لیا گیا ہے۔

قومی ٹینس اسٹار اعصام الحق قریشی کو انٹرنیشنل ٹینس فیڈریشن (آئی ٹی ایف) کے ایتھلیٹ کمیشن میں شامل کیا گیا ہے۔ اس کمیشن میں ان کے ساتھ عالمی شہرت یافتہ ٹینس شخصیات میری پیئرس، مارک وڈفورڈے، ایوا ماجولی، ارانتزا سانچیز وکاریو، فیلیسیانو لوپیز اور مولی لیوی بھی شامل ہیں۔

اسی طرح پاکستانی سارہ منصور کو آئی ٹی ایف کوچز کمیشن کا رکن بنایا گیا ہے جبکہ سید محمد علی مرتضیٰ کو آئی ٹی ایف جونیئر کمیٹی میں شامل کیا گیا ہے۔

مزید برآں ایشین ٹینس فیڈریشن (اے ٹی ایف) کی مختلف کمیٹیوں میں بھی پاکستانی نمائندوں کو اہم ذمہ داریاں سونپی گئی ہیں۔ سلیم سیف اللہ خان کو فنانس کمیٹی، ڈیولپمنٹ ایڈوائزر گروپ اور لیگل، آئین و اخلاقیات کمیٹی میں شامل کیا گیا ہے۔

کرنل ریٹائرڈ ضیا الدین طفیل کو جونیئر اور کوچز ڈویلپمنٹ کمیٹی کا حصہ بنایا گیا ہے جبکہ رشید ملک کو مارکیٹنگ اور اسپانسرشپ کمیٹی میں شامل کیا گیا ہے۔

اسی طرح شہزاد اختر علوی کو اے ٹی ایف ٹورنامنٹ آفیشی ایٹنگ کمیٹی میں شامل کیا گیا ہے جبکہ سارہ منصور کو ایڈوانٹیج آل کمیٹی میں بھی ذمہ داری دی گئی ہے۔ محمد خالد رحمانی کو سینئر، وہیل چیئر اور بیچ ٹینس کمیٹی میں شامل کیا گیا ہے۔

ماہرین کے مطابق عالمی اور ایشیائی سطح کی ٹینس کمیٹیوں میں پاکستانی نمائندگی بڑھنے سے ملک میں ٹینس کے فروغ میں مدد ملے گی اور نوجوان کھلاڑیوں کیلئے نئے مواقع پیدا ہوں گے