پاکستان میں پٹرول کی قیمت خطے میں سب سے زیادہ، مہنگائی کے سیلاب کا خدشہ

پاکستان خطے میں سب سے زیادہ پٹرول مہنگا کرنے والا ملک بن گیا ہے، جس سے ملک میں مہنگائی کے نئے سیلاب کے خدشات پیدا ہو گئے ہیں۔ شہریوں نے حکومت سے فوری طور پر پٹرول کی قیمت میں کمی کا مطالبہ کیا ہے۔

حکومت کے پاس پٹرولیم ذخائر موجود ہونے کے باوجود پٹرولیم مصنوعات کی قیمتوں میں اضافہ صرف پٹرول تک محدود نہیں رہے گا بلکہ اس کے اثرات دیگر ضروریات زندگی کی قیمتوں میں بھی خود بخود نظر آئیں گے۔

موازنہ کے مطابق، پاکستان میں ایک لٹر پٹرول کی قیمت 321 روپے 17 پیسے ہے، جبکہ بھارت میں یہ 94 روپے 77 پیسے، سری لنکا میں 293 روپے، اور بنگلہ دیش میں 116 ٹکا فی لٹر فروخت ہو رہا ہے۔ اس طرح پاکستان نے خطے کے دیگر ممالک کو پیچھے چھوڑ دیا ہے۔

پٹرولیم مصنوعات کی قیمتوں میں اضافے کے فوری بعد گڈز ٹرانسپورٹرز نے کرایوں میں 20 فیصد اضافہ کرنے کا اعلان کیا ہے، جس کے نتیجے میں اشیائے ضروریہ کی قیمتیں بھی بڑھ جائیں گی۔ پبلک ٹرانسپورٹرز نے بھی کرایوں میں اضافہ کر دیا ہے، جس سے شہریوں کے لیے سفر کرنا مزید مشکل ہو گیا ہے، اور ملازمت یا کاروبار کے سلسلے میں دوسرے شہروں میں آنے جانے والے افراد کے اخراجات بڑھ جائیں گے۔

ماہرین کا کہنا ہے کہ اس اضافے کے بعد ذخیرہ اندوزی اور منافع خوری کے امکانات بھی بڑھ جائیں گے۔ دوسری طرف، پٹرولیم مصنوعات کی قیمتوں میں حالیہ اضافے کو لاہور ہائیکورٹ میں بھی چیلنج کر دیا گیا ہے۔

حکومت کی جانب سے پچھلے اعلان کے مطابق پٹرول کی نئی قیمت 321 روپے 17 پیسے فی لٹر اور ڈیزل کی نئی قیمت 335 روپے 86 پیسے فی لٹر مقرر کی گئی ہے۔