پٹرولیم بحران: گڈز کے بعد پبلک ٹرانسپورٹرز نے بھی عوام پر کرایہ بم گرا دیا

پٹرولیم مصنوعات کی قیمتوں میں اضافے کے بعد گڈز ٹرانسپورٹرز کے بعد پبلک ٹرانسپورٹرز نے بھی کرایوں میں اضافہ کر دیا ہے جس سے مسافروں پر اضافی بوجھ پڑ گیا ہے۔

ٹرانسپورٹرز کے مطابق مختلف شہروں کے درمیان کرایوں میں 300 سے 600 روپے تک اضافہ کیا گیا ہے۔ اس اضافے کے بعد لاہور سے اسلام آباد کا کرایہ 2600 روپے سے بڑھا کر 3000 روپے کر دیا گیا ہے جبکہ لاہور سے پشاور کا کرایہ 2890 روپے سے بڑھ کر 3500 روپے ہو گیا ہے۔

اسی طرح لاہور سے سرگودھا کا کرایہ 1300 سے بڑھا کر 1550 روپے، لاہور سے فیصل آباد کا کرایہ 1200 سے بڑھا کر 1350 روپے اور لاہور سے کراچی کا کرایہ 8000 سے بڑھا کر 8600 روپے کر دیا گیا ہے۔

مزید برآں لاہور سے حیدر آباد کا کرایہ 8650 سے بڑھ کر 9200 روپے، لاہور سے رحیم یار خان کا کرایہ 4000 سے بڑھ کر 4250 روپے جبکہ لاہور سے مری کا کرایہ 2790 روپے سے بڑھا کر 3300 روپے کر دیا گیا ہے۔

لاری اڈے پر موجود مسافروں کا کہنا ہے کہ مہنگائی کے اس دور میں پبلک ٹرانسپورٹ پر سفر کرنا بھی مشکل ہو گیا ہے۔ ان کے مطابق خوشی یا غمی کے مواقع پر سفر کرنا بھی اب ایک بڑا مالی بوجھ بن چکا ہے۔

دوسری جانب ٹرانسپورٹرز کا مؤقف ہے کہ پٹرولیم مصنوعات کی قیمتوں میں اضافے کے ساتھ سپیئر پارٹس بھی مہنگے ہو چکے ہیں، اگر کرایوں میں اضافہ نہ کیا جائے تو گاڑیاں چلانا ممکن نہیں رہے گا۔

شہریوں نے حکومت سے مطالبہ کیا ہے کہ پٹرول کی قیمتوں میں فوری کمی کی جائے، بصورت دیگر مہنگائی میں مزید اضافہ ہو سکتا ہے۔