آبنائے ہرمز بحران کے دوران روسی خام تیل پاکستان پہنچنے کا امکان

آبنائے ہرمز میں جاری کشیدگی کے دوران روسی خام تیل پاکستان کو فراہم کیے جانے کا امکان ظاہر کیا گیا ہے۔

روسی ذرائع ابلاغ نے توانائی امور کے ماہر ڈاکٹر ممودہ سلامے کے حوالے سے دعویٰ کیا ہے کہ روسی خام تیل کی ایک بڑی کھیپ جلد پاکستان پہنچ سکتی ہے۔

رپورٹ کے مطابق تقریباً 7 لاکھ 33 ہزار بیرل روسی خام تیل آئندہ دنوں میں پورٹ قاسم کی بندرگاہ پر پہنچنے کی توقع ہے۔

رپورٹ میں کہا گیا ہے کہ پاکستان طویل عرصے سے اپنی تیل کی ضروریات پوری کرنے کے لیے سعودی عرب اور متحدہ عرب امارات پر انحصار کرتا رہا ہے تاہم اس سے قبل بھی روس سے خام تیل کی خریداری کی جا چکی ہے۔

پاکستان بزنس کونسل کے حوالے سے بتایا گیا ہے کہ عالمی منڈی میں تیل کی قیمتوں میں ہر 10 فیصد اضافے سے پاکستان کے جاری کھاتوں کے خسارے میں تقریباً ڈیڑھ سے دو ارب ڈالر تک اضافہ ہو جاتا ہے۔

رپورٹ میں مزید کہا گیا ہے کہ اگر عالمی سطح پر خام تیل کی قیمت 100 ڈالر فی بیرل تک پہنچ جاتی ہے تو پاکستان کا سالانہ خسارہ 5 سے 7 ارب ڈالر تک بڑھ سکتا ہے۔