پیٹرولیم مصنوعات کی قیمتوں میں اضافہ مشکلات کا پہاڑ بن جائے گا، مزمل اسلم

خیبر پختونخوا کے مشیر خزانہ مزمل اسلم نے پیٹرولیم مصنوعات کی قیمتوں میں اضافے پر وفاقی حکومت کو سخت تنقید کا نشانہ بنایا ہے۔

مزمل اسلم نے کہا کہ پیٹرول اور ڈیزل کی قیمتوں میں حالیہ اضافہ عوام کے لیے مشکلات کا پہاڑ کھڑا کر دے گا کیونکہ ملک پہلے ہی شدید معاشی مسائل کا سامنا کر رہا ہے۔

انہوں نے کہا کہ پاکستان میں اس وقت غربت کی شرح تقریباً 45 فیصد تک پہنچ چکی ہے جبکہ بے روزگاری کی شرح بھی گزشتہ 21 برس کی بلند ترین سطح پر ہے، ایسے حالات میں پیٹرولیم مصنوعات مہنگی کرنا عوام کے لیے مزید مشکلات پیدا کرے گا۔

مشیر خزانہ نے کہا کہ اس وقت عالمی منڈی میں خام تیل کی قیمت تقریباً 80 ڈالر فی بیرل ہے، تاہم انہوں نے سوال اٹھایا کہ اگر عالمی منڈی میں تیل کی قیمت 120 ڈالر فی بیرل تک پہنچ گئی تو کیا حکومت پیٹرولیم مصنوعات کی قیمتوں میں 500 روپے تک اضافہ کرے گی؟

انہوں نے کہا کہ حکومت کو عوام پر مزید بوجھ ڈالنے کے بجائے ایسے اقدامات کرنے چاہئیں جن سے مہنگائی میں کمی آئے اور معاشی دباؤ کم ہو۔

یاد رہے کہ وفاقی حکومت نے پیٹرول اور ڈیزل کی قیمت میں فی لیٹر 55 روپے اضافے کا اعلان کیا ہے جس کے بعد پیٹرول کی نئی قیمت 321 روپے 17 پیسے جبکہ ڈیزل کی قیمت 335 روپے 86 پیسے فی لیٹر ہو گئی ہے۔