کراچی چمبرآف کامرس کا صنعتوں کیلیے ہفتے میں 2روزگیس بندش کے فیصلے پر اظہار تشویش

کراچی چیمبر آف کامرس نے صنعتوں کےلیے ہفتے میں دوروز گیس بند کرنے کے فیصلے پر شدید تشویش کا اظہارکیا ہے۔ اورفیصلہ فوری طورپر واپس لینے کا مطالبہ کیاہے۔

کے سی سی آئی کے صدر ریحان حنیف اور چیئرمین بی ایم جی زبیرموتی والا نے حکومتی فیصلے پر ردعمل دیتے ہوئے کہاکہ  صنعتوں کو گیس کی بندش معیشت کے لیے انتہائی نقصان دہ ثابت ہو سکتی ہے. کراچی چیمبرکی جانب سے جاری کردہ بیان کے مطابق ریحان حنیف اور زبیرموتی والا کاکہناتھاکہ مہنگی توانائی اور پالیسیوں سے صنعتی مسابقت پہلے ہی متاثر ہو چکی ہے

فروری میں پاکستان کی برآمدات میں 8.76 فیصد کمی ہوئی،  صنعتوں کو ہفتے میں دو دن گیس بند کرنے سے پیداوار اور برآمدات متاثر ہوں گی۔

دونوں تاجررہنماؤں نے مزید کہاکہ   مہنگی توانائی کے باعث فیکٹریاں پیداوار کم یا بند کرنے پر مجبور ہیں۔   صنعتیں معیشت کی ریڑھ کی ہڈی ہیں، انہیں بلا تعطل سستی توانائی فراہم کی جائے۔

ان کاکہناتھاکہ حکومت کی جانب سے  18 رکنی توانائی ایکشن کمیٹی کا قیام مثبت قدم ہے  مگراس میں  صنعتی نمائندگی ضروری ہے۔ انہوں نے مطالبہ کیاکہ  کراچی چیمبر کے نمائندوں کو توانائی ایکشن کمیٹی میں شامل کیا جائے۔