پاکستان سٹاک مارکیٹ میں شدید مندی، 3000 سے زائد پوائنٹس کی کمی

امریکہ، اسرائیل اور ایران کے درمیان بڑھتی ہوئی کشیدگی نے عالمی مالیاتی منڈیوں سمیت پاکستان سٹاک ایکسچینج کو بھی ہلا کر رکھ دیا ہے۔ کاروباری ہفتے کے آخری روز پاکستان سٹاک مارکیٹ میں شدید مندی دیکھی گئی، جہاں ہنڈرڈ انڈیکس 3000 سے زائد پوائنٹس کھو کر 1 لاکھ 58 ہزار 154 کی سطح پر آ گیا۔ گزشتہ روز مارکیٹ 1 لاکھ 61 ہزار 210 پوائنٹس پر بند ہوئی تھی۔ عالمی سطح پر بھی صورتحال انتہائی ابتر ہے؛ امریکی ڈو جونز میں 1.6 فیصد کمی ریکارڈ کی گئی جبکہ جنوبی کوریا کی مارکیٹ 12 فیصد تک گر گئی۔ جاپان، چین اور آسٹریلیا کے انڈیکس بھی شدید دباؤ کا شکار ہیں۔ اس بحران کے باعث خام تیل کی قیمت 84.50 ڈالر فی بیرل تک پہنچ گئی ہے جبکہ گیس کی قیمتوں میں ہوشربا دوگنا اضافہ ریکارڈ کیا گیا ہے، جس سے عالمی معیشت پر مہنگائی کا نیا بوجھ پڑنے کا خدشہ ہے۔