آبنائے ہرمز کی ممکنہ بندش: وفاقی حکومت کا توانائی بحران سے نمٹنے کے لیے تین مرحلہ وار پلان تیار

وفاقی حکومت نے آبنائے ہرمز کی بندش کے پیش نظر ممکنہ توانائی بحران سے بچنے کےلیےمنصوبہ بندی شروع کردی۔ حکومت نے تین مراحل پر مشتمل حکمت عملی تیار کی ہے اور تین سے چار درجن تجاویز مرتب کی گئی ہیں جو آج وزیر اعظم شہباز شریف کوحتمی منظوری کے لیے پیش کی جائیں گی۔منظور شدہ اقدامات پر فوری عمل درآمد شروع کر دیا جائے گا ۔اس ضمن میں درآمدی پٹرولیم مصنوعات اور آرایل این جی کی طلب کم کرنے کے لیے مرحلہ وارتوانائی کی بچت کے منصوبے اور قیمتوں کے نئے طریقہ کار کو حتمی شکل دے دی گئی۔اس منصوبے کے تحت پیٹرولیم مصنوعات کی قیمتوں میں ہر ہفتے ردوبدل کیا جائے گا۔سرکاری اجلاس ورچوئل طریقے سے منعقد کیے جائیں گے اور پہلے مرحلے میں کووڈ 19 کے دوران اپنائے گئے طریقہ کار کی طرز پر تعطیلات کی تعداد میں اضافہ کیا جائے گا۔ ذرائع کے پہلے مرحلے میں حکومت سرکاری شعبے میں ان اقدامات کو نافذ کرے گی، جبکہ دوسرے مرحلے میں نجی اسکولز، جامعات اور اسپتالوں میں آن لائن اسائنمنٹس کا نظام متعارف کرایا جائے گا۔