مشرق وسطیٰ میں حالات بہتر ہونے تک پاکستان کو قطر سے ایل این جی ملنے کا امکان کم

مشرق وسطیٰ میں حالات بہتر ہونے تک پاکستان کو قطر سے ایل این جی ملنے کا امکان کم ہے۔  پیٹرولیم ڈویژن کے ذرائع کے مطابق مطابق  قطرگیس نے پاکستان کو گیس کی عدم سپلائی کے بارے میں آگاہ کردیا ہے۔

ذرائع کے مطابق  قطر سے 8 ایل این جی کارگوز  آنے تھے،جن میں  صرف 2 ہی آئے۔ ایل این جی کے بقیہ 6 کارگو 7-11-12-16-20 اور 21 مارچ کو آنے تھے۔

ذرائع کا کہنا ہےکہ  پاکستان کو موجودہ  ایل این جی کی لوڈ منیجمنٹ کرنی پڑےگی، 20 سے21 مارچ تک لوڈ منیجمنٹ کرکے  ایل این جی دستیاب  رہ سکتی ہے۔ پاکستان میں صنعتی سیکٹر سمیت دیگر شعبوں کو ایل این جی سپلائی متاثر ہوگی۔

دوسری جانب  وفاقی وزیر تجارت جام کمال نے پارلیمنٹ ہاؤس کے باہر میڈیا سےگفتگو میں کہا کہ  قطر سےایل این جی آنی ہے اور  وہ قطر سے ہی آئےگی، تاہم فیول کے متبادل آپشنز ضرور موجود ہیں۔

جام کمال کا کہنا تھا کہ  برآمدات اور درآمدات کی ذمہ داری  شپنگ لائنز کی ہے، انہیں ذمہ داری پوری کرناہوگی۔