ایران کے ڈرون آذربائیجان میں جا گرے، دو شہری زخمی، ایئرپورٹ کو نقصان، سفیر طلب

آذربائیجان کی وزارت خارجہ نے دعویٰ کیا ہے کہ ایران سے داغے گئے متعدد ڈرونز آذربائیجان کی سرزمین پر گر گئے جس کے نتیجے میں املاک کو نقصان پہنچا اور شہری زخمی ہوئے۔

وزارت خارجہ کے مطابق ایک ڈرون نخجوان انٹرنیشنل ایئرپورٹ کی ٹرمینل عمارت سے ٹکرا گیا جس سے عمارت کو نقصان پہنچا، جبکہ دوسرا ڈرون شکارآباد گاؤں کے ایک اسکول کے قریب گر کر تباہ ہوگیا۔

حکام کا کہنا ہے کہ ان واقعات کے نتیجے میں دو شہری زخمی ہوئے ہیں۔ آذربائیجان کی وزارت خارجہ نے ان حملوں کی شدید مذمت کرتے ہوئے کہا کہ یہ ڈرونز اسلامی جمہوریہ ایران کی سرزمین سے داغے گئے۔

وزارت خارجہ نے اپنے بیان میں کہا کہ یہ کارروائی بین الاقوامی قانون کی خلاف ورزی ہے اور ایران سے مطالبہ کیا گیا ہے کہ وہ اس واقعے کی وضاحت کرے اور آئندہ ایسے واقعات کی روک تھام کے لیے اقدامات کرے۔

آذربائیجان نے اس معاملے پر ایران کے سفیر کو طلب کر کے باضابطہ احتجاج بھی ریکارڈ کروایا ہے۔ وزارت خارجہ کا کہنا ہے کہ آذربائیجان کو اس صورتحال میں مناسب ردعمل دینے کا حق حاصل ہے۔