ایرانی حملوں کے بعد عالمی شپنگ کمپنی کی خلیجی ممالک کیلئے کارگو بکنگ معطل

ایران کے حالیہ حملوں کے بعد دنیا کی ایک بڑی شپنگ لاجسٹک کمپنی نے خلیجی ممالک کیلئے کارگو بکنگ عارضی طور پر بند کرنے کا اعلان کردیا ہے۔ اس فیصلے سے متحدہ عرب امارات، عمان، عراق، کویت، قطر اور بحرین شدید متاثر ہو رہے ہیں۔

کمپنی کے اعلامیے کے مطابق سعودی عرب کے بعض شہروں کیلئے بھی کارگو بکنگ معطل کر دی گئی ہے۔ تاہم جدہ اور کنگ عبداللہ بندرگاہوں پر کام معمول کے مطابق جاری رہے گا جبکہ عمان کی صلالہ بندرگاہ پر بھی سروس برقرار رکھی جائے گی۔ اردن اور لبنان کیلئے سامان کی ترسیل کا عمل بھی جاری رہے گا۔

شپنگ کمپنی کا کہنا ہے کہ یہ فیصلہ تاحکمِ ثانی نافذ العمل رہے گا اور خطے میں سیکیورٹی صورتحال کا مسلسل جائزہ لیا جا رہا ہے۔

دوسری جانب پاکستان سے خلیجی ممالک کو تجارتی سامان بھیجنے پر بھاری جنگی خطرات سرچارج نافذ کر دیا گیا ہے۔ شپنگ کمپنی Hapag-Lloyd نے فی کنٹینر پندرہ سو سے پینتیس سو ڈالر تک اضافی جنگی خطرات فیس عائد کردی ہے، جو نئی بکنگ پر لاگو ہوگی۔

اسی طرح CMA CGM نے بھی چار ہزار ڈالر تک ہنگامی سرچارج نافذ کیا ہے۔ کمپنی کے مطابق خلیج فارس کے علاوہ بحیرہ احمر جانے والے کنٹینرز پر بھی اضافی رقم وصول کی جائے گی۔

تجارتی حلقوں کا کہنا ہے کہ اس پیش رفت سے خطے میں درآمد و برآمد کی سرگرمیوں پر نمایاں اثرات مرتب ہونے کا خدشہ ہے۔