ملک بھر کیلئے بجلی مہنگی ، اطلاق کراچی پر بھی ہوگا

کراچی اور دیگر شہروں سمیت ملک بھر کے بجلی صارفین کے لیے نرخوں میں اضافے کا فیصلہ جاری کر دیا گیا ہے۔ نیشنل الیکٹرک پاور ریگولیٹری اتھارٹی نے سہ ماہی ایڈجسٹمنٹ کے تحت محفوظ فیصلہ سناتے ہوئے بجلی 35 پیسے فی یونٹ مہنگی کرنے کی منظوری دے دی۔

اعلامیے کے مطابق یہ اضافہ اکتوبر تا دسمبر 2025 کی سہ ماہی ایڈجسٹمنٹ کے نتیجے میں کیا گیا ہے اور اس کا اطلاق مارچ سے مئی 2026 تک تین ماہ کے لیے ہوگا۔ فیصلے میں کہا گیا ہے کہ اس اضافے سے صارفین پر 8 ارب 67 کروڑ 40 لاکھ روپے کا اضافی مالی بوجھ پڑے گا۔

ادارہ نے سہ ماہی ایڈجسٹمنٹ سے متعلق فیصلہ وفاقی حکومت کو ارسال کر دیا ہے تاکہ اس پر عمل درآمد کیا جا سکے۔

واضح رہے کہ مالی سال کی پہلی سہ ماہی ایڈجسٹمنٹ کے دوران بھی بجلی کے نرخ بڑھائے گئے تھے۔ جولائی تا ستمبر 2025 کی مدت میں 33 پیسے فی یونٹ اضافہ کیا گیا تھا جس کا اطلاق دسمبر 2025 سے فروری 2026 تک رہا۔