ایران میں زمینی فوج بھیجنے کا امکان رد نہیں کیا، صدر ٹرمپ کا بیان

امریکا کے صدر ڈونلڈ ٹرمپ نے ایران میں زمینی فوج بھیجنے کے امکان کو مکمل طور پر مسترد کرنے سے گریز کرتے ہوئے کہا ہے کہ حالات کے مطابق ہر آپشن زیر غور رکھا جائے گا۔

امریکی میڈیا کو دیے گئے انٹرویو میں صدر ٹرمپ کا کہنا تھا کہ وہ دیگر صدور کی طرح پیشگی یہ اعلان نہیں کریں گے کہ امریکا کبھی زمینی فوج نہیں بھیجے گا۔ ان کے مطابق یہ ممکن ہے کہ زمینی فوج کی ضرورت پیش نہ آئے، تاہم یہ بھی خارج از امکان نہیں کہ حالات ایسے رخ اختیار کر جائیں جہاں یہ قدم ناگزیر ہو جائے۔

بعد ازاں وائٹ ہاؤس میں خطاب کرتے ہوئے انہوں نے کہا کہ امریکا کے اہداف واضح ہیں، ایران کی میزائل صلاحیت اور بحری قوت کو غیر مؤثر بنانا اور اسے ایٹمی ہتھیار حاصل کرنے سے روکنا اولین ترجیح ہے۔ ان کا کہنا تھا کہ ایران کو اپنی سرحدوں سے باہر شدت پسند عناصر کو ہتھیار، مالی وسائل اور رہنمائی فراہم کرنے سے بھی روکنا ضروری ہے۔

صدر ٹرمپ نے دعویٰ کیا کہ ایران کا میزائل پروگرام جوہری صلاحیت کے تحفظ کیلئے ترتیب دیا گیا تھا اور طویل فاصلے تک مار کرنے والے میزائلوں سے لیس ایرانی حکومت مشرق وسطیٰ اور امریکا دونوں کیلئے ناقابل برداشت خطرہ بن سکتی تھی۔

انہوں نے کہا کہ امریکا نے ایران کے ساتھ مذاکرات کی کوشش کی لیکن معاہدے ناکام رہے، اسی وجہ سے فوجی کارروائی کا فیصلہ کیا گیا۔ ان کے مطابق یہ حملہ آخری اور بہترین موقع سمجھتے ہوئے کیا گیا تاکہ مبینہ خطرات کا خاتمہ کیا جا سکے۔

صدر ٹرمپ نے دعویٰ کیا کہ ایران کے دس بحری جہاز تباہ کیے جا چکے ہیں اور اس کی میزائل بنانے کی صلاحیت کمزور ہو رہی ہے۔ انہوں نے کہا کہ فوجی آپریشن طے شدہ مدت سے آگے بڑھ رہا ہے اور اگر ضرورت پڑی تو کارروائی طویل کی جا سکتی ہے۔

انہوں نے سابق صدر براک اوباما کے دور میں طے پانے والے ایران جوہری معاہدے سے 2018 میں علیحدگی کے اپنے فیصلے کا دفاع کرتے ہوئے کہا کہ وہ ایک خطرناک معاہدہ تھا اور اسے ختم کرنا ضروری تھا۔