پاکستان کے نان بینکنگ مالیاتی شعبے میں ریکارڈ نمو، اثاثوں کی مالیت 6.84 کھرب روپے تک پہنچ گئی

سیکیورٹیز اینڈ ایکسچینج کمیشن آف پاکستان (SECP) کے مطابق پاکستان کے غیر بینکنگ مالیاتی شعبے (NBFC) نے جولائی تا دسمبر 2025ء کے دوران غیر معمولی نمو ریکارڈ کی ہے۔ رپورٹ کے مطابق اس شعبے کے مجموعی اثاثے سالانہ اور ششماہی بنیادوں پر 21 فیصد اضافے کے ساتھ 6.84 کھرب روپے تک پہنچ گئے ہیں، جبکہ جون 2025ء میں یہ اثاثے 5.63 کھرب روپے تھے۔ اس عرصے کے دوران میوچل فنڈز کے اثاثے 4.5 کھرب روپے ہو گئے اور فنڈز کی تعداد 369 سے بڑھ کر 409 تک پہنچ گئی۔ سرمایہ کار اکاؤنٹس میں بھی 8 فیصد اضافہ دیکھا گیا، جس کے بعد ان کی تعداد 8 لاکھ 45 ہزار ہو گئی ہے۔

ایس ای سی پی کے اعداد و شمار ظاہر کرتے ہیں کہ سرمایہ کاروں کا سب سے زیادہ رجحان منی مارکیٹ فنڈز کی طرف رہا جہاں 44 فیصد سرمایہ کاری ہوئی، جبکہ انکم فنڈز میں 23 فیصد اور ایکوئیٹی فنڈز میں 14 فیصد سرمایہ کاری ریکارڈ کی گئی۔ اسی طرح قرض فراہم کرنے والی کمپنیوں کے اثاثوں میں 65 فیصد کا نمایاں اضافہ ہوا جو 824 ارب روپے تک پہنچ گئے ہیں۔ شریعہ کمپلائنٹ اثاثے 2.47 کھرب روپے رہے جو مجموعی مالیاتی حجم کا 36 فیصد ہیں۔ مزید برآں، رضاکارانہ پنشن اسکیم کے شرکاء کی تعداد ایک لاکھ 43 ہزار سے تجاوز کر گئی ہے اور رجسٹرڈ نان بینک مالیاتی اداروں کی تعداد 174 سے بڑھ کر 185 ہو گئی ہے۔