ایران کو معاہدے پر مجبور کرنے کیلئے ٹرمپ کا محدود فوجی آپشن پر غور

واشنگٹن: امریکی جریدے وال اسٹریٹ جنرل کی رپورٹ کے مطابق امریکی صدر ڈونلڈ ٹرمپ ایران کے خلاف محدود فوجی کارروائی کے امکان کا جائزہ لے رہے ہیں تاکہ اسے جوہری معاہدے پر آمادہ کیا جا سکے۔

رپورٹ میں کہا گیا ہے کہ ممکنہ حملے میں ایران کی عسکری یا سرکاری تنصیبات کو نشانہ بنایا جا سکتا ہے۔ اس حکمت عملی کا بنیادی مقصد ایران پر دباؤ ڈال کر اسے مذاکرات کی میز پر لانا بتایا گیا ہے۔

اخبار کے مطابق اگر ایران نے معاہدہ تسلیم کرنے سے انکار کیا تو کارروائی کا دائرہ وسیع کیا جا سکتا ہے، جس سے خطے میں کشیدگی میں اضافہ ہونے کا خدشہ ہے۔

صدر ٹرمپ اس سے پہلے بھی ایران کے معاملے پر سفارتکاری کو اولین ترجیح قرار دے چکے ہیں، تاہم انہوں نے خبردار کیا تھا کہ اگر ضروری ہوا تو فوجی طاقت بھی استعمال کی جا سکتی ہے۔

غزہ بورڈ آف پیس کے ابتدائی اجلاس میں خطاب کرتے ہوئے امریکی صدر نے کہا تھا کہ ایران کو کسی بھی صورت ایٹمی ہتھیار حاصل کرنے کی اجازت نہیں دی جائے گی، اور اسے امن کے راستے کا انتخاب کرنا ہوگا۔