پاکستان کی معاشی نمو میں تیزی: جنوری 2026 میں مہنگائی 5.8 فیصد پر آگئی، کرنٹ اکاؤنٹ بھی سرپلس

پاکستان کی معاشی نمو کا تسلسل جنوری 2026 میں بھی برقرار رہا، جہاں بڑے پیمانے پر معاشی اعشاریوں میں زبردست تیزی ریکارڈ کی گئی ہے۔ تازہ ترین رپورٹ کے مطابق ملکی معیشت استحکام کی جانب گامزن ہے، جس کا واضح ثبوت مہنگائی کی شرح میں کمی اور اہم شعبوں کی کارکردگی میں اضافہ ہے۔

صنعتی اور آٹو سیکٹر میں نمایاں پیشرفت

رپورٹ کے مطابق جنوری میں گاڑیوں کی فروخت میں سالانہ بنیادوں پر 35.5 فیصد جبکہ ٹرکوں کی فروخت میں 78.9 فیصد کا بڑا اضافہ دیکھا گیا۔ معاشی استحکام کے باعث آٹو فنانسنگ بھی 36 ماہ کی بلند ترین سطح پر پہنچ گئی۔ تعمیراتی شعبے میں سیمنٹ کی فروخت 12.5 فیصد بڑھی، جبکہ پاور جنریشن میں 12.1 فیصد اور نجی شعبے کے قرضوں میں 7 فیصد اضافہ ریکارڈ کیا گیا۔

مالیاتی اعشاریے اور زرمبادلہ ذخائر

معیشت کے لیے سب سے مثبت خبر مہنگائی کی شرح میں کمی ہے جو جنوری میں 5.8 فیصد پر آگئی۔ اسٹیٹ بینک کے زرمبادلہ ذخائر 41.5 فیصد اضافے کے ساتھ 16.2 ارب ڈالر تک پہنچ گئے ہیں۔ بیرون ملک مقیم پاکستانیوں کی جانب سے بھیجی گئی ترسیلاتِ زر 15.4 فیصد نمو کے ساتھ 3.5 ارب ڈالر رہیں، جبکہ ملک کا کرنٹ اکاؤنٹ 12 کروڑ 10 لاکھ ڈالر سرپلس رہا۔

اسٹاک مارکیٹ اور دیگر اعداد و شمار

پاکستان اسٹاک ایکسچینج کے 100 انڈیکس میں سالانہ 61.2 فیصد کی غیر معمولی نمو ریکارڈ کی گئی۔ تاہم، کچھ شعبوں میں گراوٹ بھی دیکھی گئی:

کھاد کی فروخت: 51.1 فیصد کمی

ٹریکٹرز کی فروخت: 3.9 فیصد کمی

براہِ راست بیرونی سرمایہ کاری (FDI): 26.5 فیصد تنزلی

رپورٹ میں مزید بتایا گیا کہ 6 ماہ کے ٹی-بلز کی ییلڈ کم ہو کر 10.1 فیصد پر آگئی ہے، جو سرمایہ کاروں کے اعتماد میں اضافے کی علامت ہے۔