ملکی تجارت کو بڑا دھچکا، سات ماہ میں برآمدات 35.21 فیصد تک گر گئیں

اسلام آباد: سرکاری دستاویزات کے مطابق رواں مالی سال کے پہلے سات ماہ میں غذائی اجناس کی برآمدات میں 35.21 فیصد تک نمایاں کمی ریکارڈ کی گئی ہے، جس سے ملکی تجارت کو بڑا دھچکا پہنچا ہے۔

جولائی تا جنوری غذائی اجناس کی مجموعی برآمدات 2 ارب 99 کروڑ ڈالر رہیں، جبکہ گزشتہ مالی سال کے اسی عرصے میں یہ حجم 4 ارب 61 کروڑ ڈالر تھا۔

چاول کی برآمدات میں 40.51 فیصد کمی ہوئی۔ رواں سال جولائی تا جنوری چاول کی برآمدات 1 ارب 30 کروڑ ڈالر رہیں، جبکہ گزشتہ سال اسی مدت میں یہ 2 ارب 19 کروڑ ڈالر تھیں۔

سبزیوں کی برآمدات میں 35.41 فیصد کمی ریکارڈ کی گئی۔ موجودہ مالی سال میں حجم 10 کروڑ 65 لاکھ ڈالر رہا، جبکہ گزشتہ سال یہ 16 کروڑ 49 لاکھ ڈالر تھا۔

خشک میوہ جات کی برآمدات میں سب سے زیادہ یعنی 59.36 فیصد کمی سامنے آئی۔ رواں سال حجم 13 کروڑ ڈالر رہا، جبکہ گزشتہ سال اسی مدت میں یہ 32 کروڑ ڈالر تھا۔

صرف جنوری کے مہینے میں غذائی اجناس کی برآمدات میں سالانہ بنیاد پر 4.46 فیصد کمی ریکارڈ کی گئی۔

ماہرین کے مطابق برآمدات میں مسلسل کمی زرِمبادلہ کے ذخائر، تجارتی خسارے اور زرعی شعبے کی کارکردگی پر منفی اثرات مرتب کر سکتی ہے۔